Cruz Vermella publicou recentemente cinco ofertas de emprego para cubrir postos necesarios de cara á chegada de refuxiados da guerra de Ucraína ás instalacións da congregación relixiosa das Esclavas da Santísima Eucaristía de Sobrado do Bispo, no concello de Barbadás. Esta acollida, que se estima que superará o medio cento de refuxiados, está impulsada por Cruz Vermella, a congregación relixiosa e o Concello de Barbadás.
Por unha banda, as instalacións son propiedade das monxas, que as cederán para hospedar a estes fuxidos da guerra. Cruz Vermella é a encargada de atopar aos profesionais para ofrecerlles todos os servizos, neste caso buscan un administrativo, un gobernante, un subalterno, un integrador social e un traballador social. No caso do Concello, encárganse de aportar o apoio loxístico para que a acollida se desenvolva nas mellores condicións posibles. Por exemplo, acometerán algunhas obras de reforma nas instalacións da congregación relixiosa para facer dese albergue un lugar máis confortable.
Ademais, dende a concellería de Educación indican que se está a desenvolver un plan para que os máis cativos se integren con facilidade na súa nova comunidade. Os mestres dos centros educativos de Barbadás xa están concienciando aos cativos da chegada nas vindeiras semanas dos seus novos compañeiros. Ademais de proporcionarlles xoguetes, xa se adquiriron libros de contos infantís no seu idioma nativo.
