Día das Letras Galegas en Ourense: música tradicional, xogos e xantares populares

Ducias de actos en defensa da cultura e a lingua galegas salpican estes días de campaña electoral. A maioría dos concellos ourensáns preparan diferentes actividades para conmemorar o Día das Letras Galegas, destacándose os concertos, os xantares populares, os xogos tradicionais e os recitais lembrando a figura do persoeiro ao que se lle adica este 17 de maio: Francisco Fernández del Riego, intelectual nado en Lourenzá (Lugo) e cofundador da Editorial Galaxia. Cidade de Ourense A gaiteira Susana Seivane ofrecerá un concerto gratuíto na Praza Maior o propio día 17 ás 19,30 horas. A música, porén, comezará ás 19.00 horas, cun concerto a cargo do Coro Xuvenil Cantiga de Ourense. Ademais, 1.200 persoas participarán hoxe nos actos de Salesianos e o Concello de Barbadás organiza, tamén o 17 de maio, a II Foliada das Letras Galegas, unha xornada na que a cultura galega será a principal protagonista. VALDEORRAS Ramón Nicolás e Ricardo Gurriarán deron comezo onte á programación cultural na comarca cun coloquio no que relacionan a Del Riego con Delgado Gurriarán. Na Rúa as actividades desenvolveranse entre o 17 e o 19, con exposicións e xogos para os máis pequenos. CONSO-FRIEIRAS Viana do Bolo acolle mañá a actuación “Contos, cantos e poemas”; A Mezquita ten hoxe un obradoiro de lettering para nenos, ás 19,00 horas foliada e ás 21,00, concerto de “Maskarpone”. Na Gudiña celebran mañá, a partir das 18,00 na Casa da Viúva, un contacontos e unha foliada. RIBADAVIA A programación comezou esta fin de semana cun encontro de escritores. Continúan hoxe coa presentación do libro “A nunca vista”, de Ana Abad, e seguirán mañá con pasarrúas, música tradicional a cargo do grupo Sadeo. Ademais, hai descontos durante toda a semana para mercar libros en galego. CELANOVA A romaría Raigame, que se celebra en Vilanova dos Infantes, é o principal acto da comarca, aínda que tamén destacan os encontros de teatro que se celebran durante toda a semana en Bande. CARBALLIÑO Son máis de vinte as actividades que celebra o Concello do Carballiño polas Letras Galegas. A maioría deles están relacionados co cineclube, con máis dunha decena de proxeccións, aínda que tamén se contemplan monólogos, concertos e unha “Ruta das Tapas” polos locais da vila. XINZO O 17 farase a entrega de premios do VII Concurso literario de narrativa curta e dos concursos de debuxo da Fundación Carlos Casares, así como a presentación da nova edición en ucraíno de “A Galiña Azul” de Carlos Casares. ALLARIZ Hoxe os festexos do día das Letras en Allariz empezarán ás 22,30 horas na Praza Maior cun concerto de Guezos e Loita Amada. Mañá, na praza de Abaixo, haberá un espectáculo para público familiar de Xoan Curiel, “Cantando as nosas letras”, ás 19,00 horas. Nas rúas polo galego A plataforma “Queremos Galego” sairá ás rúas da cidade mañá ás 12,00 horas en defensa da lingua. Baixo o lema “En galego aquí e agora”, representantes da plataforma en Ourense explicaron que se tratará dun “acto festivo e reivindicativo”, indicou o seu delegado na provincia, Xosé Lois González, “O Carrabouxo”.