A conselleira de Promoción do Emprego e Igualdade, Elena Rivo, acompañada da directora xeral de Ordenación e Innovación Educativa, Judith Fernández, visitou onte o CEIP de Prácticas de Ourense, un dos centros educativos participantes no programa “Donas de si” do Plan Proxecta. Esta iniciativa promove a participación e produción das mulleres na configuración e desenvolvemento da sociedade galega. Rivo agradeceu o labor do alumnado “a prol de estender a presenza feminina a todos os ámbitos da vida, revertendo calquera tipo de desequilibrio, discriminación ou violencia por razóns de xénero”.
Segundo destacou, “Donas de si” busca recoñecer “o papel político, social, artístico e cultural” da muller e “superar a visión tradicional que presenta as súas achegas como anecdóticas ou secundarias”. “Cómpre realizar unha aproximación de conxunto, que contemple a variable de xénero, a figuras relevantes da nosa historia para construír a memoria histórica feminina de Galicia”, engadiu.
A conselleira sinalou que o traballo dos centros neste programa pódese centrar nas mulleres relevantes pero tamén en compartir o labor das máis próximas á contorna do alumnado, como poden ser as nais, irmás ou avoas que -de feito- son as homenaxeadas en boa parte dos traballos do CEIP de Prácticas ourensán. Esta iniciativa vén acompañada de material didáctico difundido pola Xunta e mesmo de cursos de formación para o profesorado, sobre igualdade ou construción da identidade libre de estereotipos de xénero. Rivo sinalou que “é un orgullo comprobar como as novas xeracións veñen pisando forte para avanza cara á igualdade efectiva entre mulleres e homes”. Neste senso mencionou a nova Lei de Igualdade xa en vigor
