Entrevista | Luis Menor: “Crear emprego e riqueza é o obxectivo para fixar poboación”

O alcalde de Pereiro de Aguiar e exdirector de Emerxencias da Xunta, Luis Menor, converteuse onte en presidente da Deputación de Ourense, que gobernará en minoría, pero con vocación de “moito diálogo e consenso” cos grupos da oposición. Onte, apenas dúas horas despois da investidura, atendeu en exclusiva a La Región e Telemiño, no propio Pazo Provincial, para trazar a súa folla de ruta. Promete un “estilo propio” para gobernar, pero pide un tempo de escoita pola provincia para poñer a andar un proxecto provincial para o que lle pide ás outras administracións unha “discriminación positiva”. Entrevista | Luis Menor: "Moitos alcaldes pedíanme o paso, eu non vía ético autopostularme" Cales son as primeiras sensacións no cargo? Moi agradables. Tomamos posesión do cargo nun clima moi distendido, rodeado de amigos, e, polo tanto, as primeiras sensacións son dunha alegría grande. E, ao mesmo tempo, plenamente consciente da responsabilidade que asumo co cargo. Falou no seu discurso do “acto de xenerosidade” de Manuel Baltar dando un paso ao lado. Non o digo eu, téñeno dito moitas persoas e eu ratifícoo. Baltar deu un paso ao lado sen que ninguén llo pedira, nin fóra do partido por negociacións nin, por suposto, dentro de partido. El cría que podía facilitar negociacións e acordos e que era o mellor que podía facer. Iso di moito do seu talante e a súa xenerosidade. Colleuno por sorpresa que os compañeiros pensasen en vostede? A miña primeira sorpresa foi a dimisión de Baltar, despois explicada e razoada. Encontrámonos, de repente, sen un candidato a presidente da Deputación.Foi unha sorpresa para todo o mundo, non sabiamos da súa intención. Todo foi xurdindo logo nun proceso diferente. Unha vez que Baltar non vai optar á reelección, ábrese unha nova situación, cada un toma as súas decisións. O meu proceso foi de abaixo a arriba, non veu de Santiago. Foi un proceso natural e iso pálpase clarisimamente vendo aos alcaldes. Moitos compañeiros dixeron que estaban de acordo en que fora eu. As primeiras chamadas tomeinas case como un cumprido, pero isto foi collendo unha dinámica ata que chegou un momento en que dixen que se imos en serio, imos en serio. Se queredes que eu encabece, trasladádeo. Quería que fose o máis unánime posible, porque había lexítimas aspiracións. Foi en pouco tempo e resolvémolo moi rápido, porque non é bo que estes procesos se alarguen no tempo. E todo isto en campaña electoral, o cal o complicaba máis. Era outro elemento que nos facía apremar a solución. Había que facelo o mellor e o máis rápido posible e tiña que resolverse con consenso. As lexítimas expectativas que puidera haber tiñámolas que medir internamente. E había que resolvelo canto antes. Deixando o pasado e pensando no futuro. No seu discurso dixo que tiña un “estilo propio”. Cal é o estilo Luis Menor? Que eu teña un estilo propio non quere dicir que estas características non as tivera o anterior. Son unha persoa que me caracterizo moito pola cercanía e o contacto directo polas persoas. Gústame moito a xente, gústame o territorio. Percorrín toda Galicia na Dirección Galega de Emerxencias. No Pereiro gústame ir a todos os lugares e na Deputación tamén me gustaría. O meu estilo é o diálogo, a cooperación, a escoita, a cercanía e moito pisar terreo. Pediu a implicación de todos os que van formar o equipo. Non é posible levar isto cunha persoa soa a nivel político. Preciso dos meus compañeiros de corporación, os primeiros os deputados do equipo de goberno, pero tamén teño a man tendida a escoitar propostas da oposición. A miña forma de traballar é en equipo, creo no liderado, si, non creo no repartir tarefas sen ton nin son. Hai que planificar e hai que executar. Se o facía nun concello, como non o vou facer aquí, nunha provincia. O reparto de tarefas vai ser moi notorio. No meu equipo hai perfís distintos e sacaremos as potencialidades de cada un. Luis Menor junto a su mujer y su hija con el bastón de mando. Xa adiantou que vai asumir en primeira persoa a materia de cooperación. Por que? Ao final a cooperación exércea fundamentalmente o presidente da Deputación. É o que ten a interlocución cos alcaldes. E, ademais, como eu teño esa vocación e son alcalde, creo que sei bastante ben cales son as necesidades dos concellos. Levo moitos anos na política e coñezo bastante ben o funcionamento dos concellos. Entendo que a mostra máis clara é non andar con intermediarios. E non digo que a vaia levar só. Vaime axudar algún compañeiro e loxicamente os técnicos e empregados da casa. Pero quero falar de cooperación directamente cos alcaldes. É un xesto acaído á miña forma de ser. Estamos a inicio de mandato, temos proxectos a catro anos, é o momento de coñecelos, de planificalos, impulsalos e executalos. Que mellor que coñecelos de primeira man! Fala da Deputación como un proxecto provincial. Entendo que a provincia ten proxectos dun ámbito supramunicipal e supracomarcal e o eixo vertebrador é o goberno provincial. Se se fai algo en termalismo, parece acaído traballar con outras administracións, pero que o coordine a Deputación. Se falamos de envellecemento podemos traballar coa Xunta e os concellos, pero a Deputación ten moito que dicir. Temos moito que dicir nos proxectos de provincia. Falamos de proxectos transversais, supramunicipais e supracomarcais. Falando de proxectos, estamos neste Pazo Provincial, que se prevé converter nun gran hotel balneario. Vai continuar co proxecto? É un proxecto moi importante e atractivo. Ninguén pon en dúbida que Ourense ten que aproveitar o termal. Unha das débedas que temos é ter unha gran infraestrutura termal. Non sei que grao de madurez administrativa ten o proxecto e quero enterarme. Paréceme algo estratéxico e pido un pouquiño de tempo, máis ben polas consecuencias que tería. É un proxecto totalmente defendible. Vai seguir a Deputación en entidades como Partenalia ou a asociación de cidades termais europeas? Sen dúbida ningunha. Son temas nos que a Deputación ten que estar presente. Outra cousa é que o presidente Baltar, por seu traballo e experiencia, por coñecer xente, non só formaba parte senón que lideraba esas organizacións. Eu, como recén chegado, non procede que me poña a liderar. Pero, por suposto, a participación nese tipo de asociacións está garantida. Que prioridades se marca? Acabo de aterrar, e de maneira non prevista con moita antelación, e preciso falar con todo o mundo e priorizar. Temos claro que a chegada do AVE, o turismo, o mundo do viño, potenciar os camiños de Santiago e as áreas industriais son algunhas delas. Crear emprego, crear riqueza e fixar poboación é o obxectivo. De aí se derivan todos os servizos. E seino porque son alcalde dun concello que ten esas capacidades, crece en poboación e actividade económica, e gustaríame que fose a tendencia da provincia, aínda que é difícil. É difícil cambiar unha tendencia provincial tan acentuada. Pero temos potencialidades e hai que traballar nelas. A creación de empresas, a creación de riqueza e a potenciación das áreas industriais paréceme o máis importante. Agora mesmo estamos en proceso de ampliación de parques en San Cibrao e Pereiro, quédanos Paderne, Taboadela… É fundamental coas novas comunicacións e a nosa situación xeoestratéxica beneficiar a actividade, sobre todo ligada á loxística. A estación de mercadorías tamén me parece absolutamente prioritaria. Pereiro é dos poucos que medra económica e poboacionalmente. É extrapolable a política de alí ao resto da provincia? Creo que hai cousas que si, e cónstame que se están facendo noutros sitios. Pereiro ten cousas que fan que a poboación aumente, como un parque empresarial que actúa como tractor da economía e asentador da poboación. Temos outros atractivos, como os servizos, que axudan moitísimo ás familias e fan que persoas que non traballan en Pereiro decidan vivir alí cos fillos, como o servizo de conciliación gratuíto e case os 365 días do ano. A palabra conciliación para nós leva unha longa historia, xunto á mellora dos servizos sociais, unha boa oferta educativa…. A provincia precisa emprego e servizos. A xente necesita traballar e ter servizos. “Imos esixir unha discriminación positiva frente a outras provincias” Os alcaldes insisten na axuda aos pequenos concellos. Cre que a Deputación debe pór o foco aí? Iso tamén o din os grandes, por que lle dás tanto aos pequenos, pero hai un compoñente de solidariedade. Debe haber unha discriminación positiva para os pequenos. A razón da Deputación é a cooperación cos concellos para a prestacións dos servizos. En Ourense hai concellos moi pequenos que non teñen capacidade para prestar os servizos básicos sen a Deputación. Non teñen case capacidade máis que para nóminas e gasto corrente, e quedan sen capacidade inversora. Neses concellos temos que ter unha atención importante. Non podemos despoboar o noso territorio. Os concellos pequenos non deben ter ningún tipo de temor. Unha cousa é racionalizar e optimizar os recursos, e outro garantir que os cidadáns vivan onde vivan deban ter servizos. O reparto de fondos vén sendo a principal causa de choque entre o goberno provincial e a oposición. Por onde vai ir Luis Menor? Pido paciencia. É un motivo de puxa política. Como alcalde, sei que hai un manual da oposición moi claro, que é dicir que o goberno sempre me trata mal. Ás veces é certo e ás veces non. Aquí hai concellos que non están gobernados polo PP que non levan tido mal trato. Algún si é certo que puido ter menos achegas. Creo que temos que facer todos un esforzo. Esta provincia ten unhas características moi particulares. Un problema complexo non pode ter unha solución fácil. Enseguida se fala de plan único e de coller o de Pontevedra. Pero é que Pontevedra non ten nada que ver con Ourense, non ten concellos de 500 habitantes. Ao mellor, aplicar ese tipo de solucións non vale en Ourense. Iso non quere dicir que non nos poñamos a traballar para poder modificar e consensuar, que é a miña intención: abrir un diálogo e falar do financiamento dos concellos. Pode asegurar que se cambiará o reparto de fondos? Diálogo vai haber; garantir que vai haber acordo, non podo. Depende do que pidan. Penso que temos que facer cousas e estou seguro que imos avanzar no modelo de financiamento. Non só é xente da oposición, son tamén membros do PP os que falan de abrir un diálogo sereno sobre o financiamento e de que se pode repartir de xeito diferente. E para iso quero escoitar a todo o mundo e a ver se somos capaces de chegar a un acordo, aínda que en materia de diñeiro é difícil, pero acadarémolo. Ten un aliado en Alfonso Rueda na Xunta, co que traballou moitos anos man a man. Vaille pedir para Ourense? Está claro e el sábeo. Con Rueda teño unha relación moi cordial, primeiro profesional e despois de amizade. Eu onde estiven sempre reivindiquei, sempre con argumentos e formas correctas. Hai que ser insistentes. Como presidente da Deputación vou ser un leal colaborador pero vou esixir todo o que lle corresponde a esta provincia, porque a esta provincia non lle sobra, e todo o que fagamos será pouco. Cre que esta provincia merece unha discriminación positiva respecto a provincias atlánticas? Si, ao igual que cando falamos de concellos grandes e pequenos. Esta provincia, pola súa dinámica, aínda non pode competir con A Coruña ou Pontevedra. Necesitamos unha discriminación positiva, que ten que ser produtiva, e non para empregala en cousas que non teñan retorno económico. Como dixemos antes, crear emprego, crear riqueza e que logo veñan os servizos. Imos esixir esa discriminación positiva. Cal vai ser a relación co Concello de Ourense. Haberá proxectos comúns entre ambas as dúas administracións? Saberán entender iso nos pequenos concellos? É unha cooperación perfectamente válida. As deputacións están para axudar aos pequenos concellos, iso é totalmente innegable, pero hai cousas transversais que se lle van ben á capital da provincia, vaille ben a toda a provincia. Un de cada tres ourensáns vive na cidade e un terzo do financiamento estatal vénnos da poboación que reside na cidade. Non vai haber un trato proporcional, pero podemos colaborar. Por que non podemos colaborar co transporte metropolitano e no abastecemento e saneamento, aproveitando por exemplo a depuradora de Ourense, que está infrautilizada? O que non imos facer é que Ourense entre no plan de obras, pero si entendernos. “Que quede claro: seguirei sendo alcalde do Pereiro” Non teme que ser alcalde o lastre? Como vai compatibilizar os cargos? É importante ter medios, e nesta institución hai moitos. E cando os hai, facilitan as cousas. O presidente da Deputación da Coruña é alcalde das Pontes, que é máis grande ca Pereiro, é presidente dunha deputación moito máis grande que a de Ourense e é secretario xeral do PSdeG. Así que entendo que, aínda que haberá que cambiar a forma de traballar, é factible. E se poñemos nunha balanza ser alcalde ou non á hora de ser presidente de Deputación é máis o positivo. É innegable que delegarei máis no Pereiro, pero alí temos moitos concelleiros. Non estarei tanto tempo, pero si o que sexa necesario. Quero deixar claro que non vou deixar de ser alcalde do Pereiro, porque é perfectamente compatible. Síntome na obriga moral de seguir servindo aos meus veciños. Se moitos compañeiros se fixeron en min foi, en boa medida, polo bo traballo que se fixo no Pereiro, ratificado nas urnas. Irá ao Senado se é elixido? Estaba moi ilusionado con ser senador, pola miña formación xurídica, pero témome que evidentemente non é posible compatibilizalo, aínda que xuridicamente si o sería. Non teño vocación de acumular cargos, gústame cumprir alí onde estou. A que lle ten máis medo? A non acertar para mellorar as cousas. Non pola miña repercusión política, senón pola provincia. Entra vertixe ao ver que a institución que ti presides é unha referencia para a provincia, e que é o lugar ao que a xente acode a buscar solucións. O medo é a fallar. A aposta polos eventos culturais, como o Festival de Cine, vai seguir? Baltar fixo un labor de visibilización da Deputación moi importante no eido cultural. O festival de cine era unha mágoa que se perdera. Pola miña parte, terei a mellor predisposición, pero o que si me gustaría é que se implicase de novo o Concello, pois naceu ligado a el. A que alcalde verá primeiro? Non teño decidido quen será o primeiro, pero non ten importancia porque aspiro a ir onde todos. Valdeorras merece un trato especial? Necesita unha atención específica. Demandaremos a A-76, que achegará unha comarca tremendamente rica e cun potencial enorme. Teño no meu equipo á alcaldesa de Carballeda de Valdeorras e quero que ela encarne a presenza e colaboración. E eu terei unha presenza regular nesa comarca. En canto á nova sede, considero que sería bo ter un punto de referencia físico na comarca. En canto aos incendios, hai que mellorar? Como exdirector xeral de Emerxencias, direi que esta Deputación sempre tivo unha gran colaboración, foi a primeira que pechou o mapa de emerxencias, presta maquinaria aos concellos, colabora nas campañas de prevención… E nós estamos totalmente a favor de continuar con eses proxectos e se cabe incrementalos. A clave é a prevención e a Deputación de Ourense é a que máis colabora de toda Galicia, algunhas non querían saber directamente nada. Ata para aumentar os grupos de emerxencias puñan problemas. Vai manter a Deputación o apoio á Estación de Montaña de Manzaneda? Parece racional que si. Temos que ser capaces de atopar o mecanismo que a faga viable. A comarca de Trives, como moitos sitios da provincia, non está sobrada de oportunidades, e obviamente a estación é un motor económico. O cambio climático non está axudando e cada vez hai menos neve, pero temos que ser quen de atopar as posibilidades, hai moita infraestrutura alí. Agora que estamos tan ben conectados co resto de España, temos que ser capaces de convertela no que sempre aspirou a ser: creador de riqueza e emprego e dinamizador de toda esa zona. El discurso de Luis Menor como nuevo presidente de la Diputación de Ourense