Unha escola para retomar a historia musical de Vilamarín

A música regresará o 1 de setembro a Vilamarín, cando arranque o primeiro curso da súa nova Escola de Música municipal. “Tiñamos moitas ganas de ter algo relacionado coa música”, explica o alcalde, Amador Vázquez. Este recorda que Vilamarín foi o primeiro concello rural en ter unha banda de gaitas e só por detrás da Real Banda de Gaitas da Deputación. Vázquez indica que “aínda que nos foi ben durante case 30 anos, no último lustro a cousa foi decaendo, e agora queremos recuperar esta tradición, xa sexa a través da banda de gaitas ou a través da escola de música”. Pero o verdadeiro promotor desta idea foi Diego Padín, un músico nado en Vilanova de Arousa pero casado en Coles que quere que a cativada dos concellos integrantes da Mancomunidade de Santa Águeda (Vilamarín, Coles, A Peroxa e Amoeiro) poidan ter un servizo polo que terían que desprazarse ou ben a Ourense ou ben a Carballiño. O primeiro que destaca Padín, director deste centro, é a “enorme facilidade” que lle deron dende o Concello para levar adiante a súa idea. Outra das facilidades atopadas foi a de atopar profesorado, xa que o director xa colaborou con eles noutros momentos. Polo momento, son sete os profesores implicados neste novo proxecto. A terceira das facilidades é o local, que o cede o propio Concello na Casa da Cultura. Padín xa ten experiencia dando clases e desenvolvendo labores de coordinación porque xa o fixo na Cañiza. Agora, considera que Vilamarín é “un punto estratéxico” porque “non hai nada semellante preto”. E iso estase demostrando na alta demanda de solicitudes: xa son máis de 40 os inscritos para o vindeiro curso, unha cifra “moi satisfactoria” xa para Amador Vázquez. Padín tamén está moi contento con esta cifra, aínda que lle gustaría chegar “se podemos, ata os 60, que para un primeiro ano está moi ben”. Enfoque moderno Neste primeiro curso ofertaranse unha ducia de clases diferentes: piano, guitarra, batería, baixo, ukelele, canto, acordeón, batukada, pandeireta, gaita e baile. “É unha oferta case á carta”, destaca o alcalde de Vilamarín. Deste xeito, busca diferenciarse do resto das escolas ofrecendo algunhas aulas “alternativas”, como o caso da batukada, que consistirá nunha clase en grupo -dun mínimo de 8 ou 10 persoas- e recrear esta música tradicional brasileira con tambores, caixas ou repiques. No caso do coro, Padín indica que “buscamos fuxir da típica coral e ímolo enfocar máis cara o gospel ou o soul, que é algo que non hai case en Ourense”. A finais do mes pasado realizaron dúas xornadas de portas abertas para que os cativos tiveran o primeiro contacto cos profesores e lles contaran cal é o seu instrumento favorito. “Foi unha boa forma de formalizar matrículas”, asegura Padín. Como o día da inauguración cae a xoves, o director explica que “abriremos toda esa semana para que se poidan formalizar máis matrículas e ir confeccionando os horarios para que se adapten ás necesidades de cada un, tanto nas clases individuais como nas grupais”. Ademais, tamén se repetirá durante esa semana outra xornada de portas abertas para que “todo o que teña dúbidas remate por apuntarse”.