O profesor ourensán José Paz Rodríguez será medalla de ouro da provincia. O presidente da Deputación aproveitou a inauguración da mostra de Afonso X no Valcárcel para recordar a súa figura, e nunha ocasión “na que falamos de cultura, de historia e de Ourense” anunciou o inicio dun expediente para a concesión deste galardón a José Paz, falecido o pasado 23 de abril, “e co que tiñamos grandes proxectos que levaremos adiante malia a súa desaparición física”, prometeu o líder provincial.
Referiuse así Baltar á doazón dunha das coleccións máis importantes do mundo, composta por 30.000 volumes dedicados ao premio Nobel de Literatura, o poeta e filósofo bengalí Rabindranath Tagore, nado tal día coma onte en 1861, ademais doutras amplas bibliografías relacionadas co mundo do cinema, a arte popular ou a pedagoxía.
Neste senso, o Edificio de Ferro do Campus de Ourense acolleu, para celebrar o 160 aniversario do nacemento de Tagore, unha xornada de charlas en memoria de José Paz, que dedicou a súa vida ao estudo desta obra. Interviron con relatorios José Manuel Cid e Xosé Lois Carrión, entre outros. O seu soño era crear un Centro Tagore na cidade, chegando a reunirse con Baltar este mesmo ano para ceder á institución as súas bibliotecas.
