Félix Rubial, xerente da área sanitaria de Ourense, Verín e Valdeorras, analiza os datos de listas de espera publicados por Sanidade.
A demora para especialistas segue crecendo na provincia.
A situación continúa sen estar resolta, pero o noso problema está en tres especialidades. O 67% dos pacientes esperan por cita en Rehabilitación, Traumatoloxía e Oftalmoloxía. Dos 25 servizos restantes, ningún supera os 50 días de demora.
Que sucede nesas tres especialidades?
Temos vacantes por enfermidade, por baixas, por interinidades, imposibles de cubrir. Non hai especialistas e os servizos están facendo un esforzo extraordinario, pero aínda así a lista crece.
Afecta a falta de profesionais nos comarcais?
Claro. En Traumatoloxía houbo que dar apoio aos hospitais comarcais por falta de especialistas, ao igual que en Oftalmoloxía, o que provoca un impacto no CHUO.
Deberíanse unificar servizos na cidade?
Non, hai que facer o que se fai. Calquera continxencia nos comarcais debe ser cuberta desde Ourense. Sempre priorizamos mover profesionais a ter que mover pacientes. Pero o concurso de méritos que o Sergas convocou para centros de difícil cobertura vai permitir que esta situación se minimice enormemente.
No caso de Neumoloxía, os tempos melloraron moito.
Porque chegou un novo xefe ao servizo e están completas todas as prazas de profesionais, o que permitiu reordenar as consultas e diminuír a demora.
Ourense e Lugo teñen os peores tempos en consultas, afecta o envellecemento?
Seguramente, a frecuentación en persoas maiores é máis alta, especialmente en determinadas especialidades como Oftalmoloxía ou as que afectan á patoloxía osteomuscular.
Que medidas se deberían poñer en marcha?
O primeiro impacto virá dado coa toma de posesión dos profesionais do concurso de méritos, que cando menos cubrirán as vacantes dos comarcais, o que tamén terá consecuencias en Ourense. Seguiremos coa actividade extraordinaria, moi orientada a atender a pacientes prioritarios. E agardamos que as prazas tamén sexan cubertas coa vindeira tanda de residentes.
