Feminismo interseccional na intervención social a mulleres

A Facultade de Educación e Traballo Social do Campus de Ourense acolleu este mércores a celebración da xornada “Feminismos inteseccionais: coidados, diversidade e ruralidade”. Coordinada pola profesora de Socioloxía Iria Vázquez a actividade contou coas conferencias de Ana Martínez, traballadora social na cooperativa A Morada, e de Araceli Macías García, educadora social en Outonía no rual de Lugo e Ourense.

Iria Vázquez explicou a orixe do termo intersccionalidade, para contextualizar o traballo realizado polas dúas cooperativas sociais e a súa importancia: “A interseccionalidade foi aplicada nas ciencias sociais pola avogada afroamericana Kimberlé Crenshaw en 1989; a través deste concepto pódese avaliar as interaccións e interseccións dos distintos sistemas de opresión, destacando as consecuencias destes nos dereitos das mulleres”.

Deste xeito, a coordinadora da actividade sinalou que a traballadora social Ana Martínez González, da cooperativa A Morada de Vigo, expuxo “a necesidade de pensar os coidados desde a xustiza e o seu reparto equitativo”.

Por outra banda, Araceli Macías García, falou da “necesidade de rachar cos mitos e estereotipos que rodean as mulleres do eido rural”. A relatora falou, en plural, da “necesidade de vincularnos cos feminismos comunitarios, que poñan o territorio como eixe vertebrador das súas reivindicacións”. A súa entidade busca “contribuír ao cambio de ollada cara unha ética dos coidados e o bo trato” e entre outras actividades realizan proxectos de coeducación, iniciativas participativas para mulleres maiores das zonas rurais ou implementación de proxectos para a prevención das violencias machistas.