Na colisión que se produxo ás 14.00 horas víronse implicadas dúas motos.
Un motorista resultou ferido de gravidade este martes nun accidente de circulación que tivo lugar no concello ourensano de Maceda.
Segundo informou a Central de Atención a Emerxencias 112-Galicia, o suceso tivo lugar pouco antes das 14,00 horas deste martes na OU-536, ao seu paso por Maceda.
Aínda que na colisión se viron implicadas dúas motos, só necesitou asistencia médica un dos condutores.
Ata a zona desprazáronse efectivos da Garda Civil de Tráfico, así como unha ambulancia do 061, que trasladou ao ferido a un centro hospitalario.
