Festas do pobo para o pobo

Un grupo de cinco mozos de Piñor (Barbadás), Rubén Arce, Joel Álvarez, Daniel Delgado, Adrián Varela e Borja Varela, recuperarán este ano, por primeira vez trala pandemia, as tradicionais festas de San Lourenzo de Piñor: tanto as que honran á Virxe das Neves (o 4 e o 5 de agosto) como as de San Lourenzo (o 9 e o 10 de agosto). E organizar ámbalas dúas festas non é algo menor, xa que será a primeira vez que as dúas estean organizadas pola mesma comisión de festas, xa que tradicionalmente as festas das Neves organizábana os solteiros, e as de San Lourenzo, os casados. O que buscan con isto é, como conta Rubén Arce, “facer que non se perdan as festas propias, que a calquera veciño lle enchen de orgullo, e tamén dar un servizo á veciñanza, que pasou unha época moi dura durante a pandemia e tamén é unha alegría para todos poder volver a xuntarnos no campo da festa”. Todo isto, ademais, está feito dende o altruísmo. Os cinco compaxinan os seus traballos con tardes de colaboración para poñer todo a punto. “Todo leva o seu tempo. Pero por sorte levámonos moi ben entre nós, somos amigos de nenos, e así faise todo algo máis levadeiro”. Pola súa banda, a veciñanza reaccionou “moi positivamente” á noticia da recuperación destas festas. E, como en moitas festas populares, os ingresos para mantelas saen “do bar, da comida e das doazóns que fan os veciños”, mantendo unha tradición das festas galegas do rural que é pedir cartos para as mesmas polas portas das casas. De todos xeitos, aínda non teñen decidido canto será a cota para participar. “Grazas a cada habitante da aldea que comprende a situación e se porta ben, nós podemos manter estas festas”, conta. O grupo, que non é a primeira vez que organiza celebracións, tamén puido sentir o cariño e a colaboración doutros veciños que, ao saberen que volvían as festas, ofrecéronse a colaborar con eles en distintos aspectos. “Nós estamos abertos a toda colaboración, incluso o propio día da festa para servir. Toda axuda sempre é boa e xa houbo xente que nos comentou que quería colaborar”. “Por sorte cada día hai máis xente nova en Piñor, e xente que quere manter unhas festas propias”, indica Arce, que tamén pide que o ano que vén haxa voluntarios para coller as festas. “Cada ano vótase unha comisión diferente para organizar as festas, así que, se hai voluntarios moito mellor que sexa alguén escollido case pola forza”, ri Arce. Con todo, garante a continuidade das celebracións, xa que eles seguen con ilusión e con ganas de que “non se perda o noso”. A comisión organiza outros eventos para “manter a aldea viva e á xente contenta” Pero a actividade destes cinco mozos non queda só na recuperación das festas populares. Para datas anteriores, coma o día de San Xoán, organizarán unha cea o sábado, 25 de xuño, cun menú que constará de “empanada, costela asada, chourizo, viño, bica e licor”. Ademais, o prezo “sempre é popular” e non superará os 10 euros para todo aquel que decida achegarse á gran celebración do verán. E non contentos con iso, o 11 de xullo, polo San Benito, montarán unha pequena barra de bar para ofrecer unha pequena sesión vermú, así como pan para acompañar esta outra celebración da contorna e así recadar un pouco máis para que as festas sobrevivan. Isto responde a que, para os cinco integrantes desta comisión de festas, manter as tradicións que eles viviron de nenos é importante, e máis en tempos do poscovid, xa que “é unha forma de manter a aldea viva, de que a xente estea contenta e poida volver xuntarse despois de tanto tempo solos, e aínda por riba, se é con comida, bebida, e música de por medio, moito mellor”.