O galego, un idioma no que os falantes din sentirse “máis libres”

"Tendo raíces, que importa o vento”. É a frase que Berta González elixiu para levala toda a vida plasmada na pel. Unha rosa dos ventos acompañaba á tatuaxe e, a súa portadora, asegurou que a lingua é a súa razón de ser, a ligazón co pasado, presente e futuro. Celso Sánchez, pola súa banda, citaba a Castelao: “Se somos pobo é, fundamentalmente, pola lingua”. E engadía: “E por outras moitas cousas que temos”. Ángela Pichel, unha estudante de Traballo Social, di que ao se expresar en galego, atópase coa súa verdadera esencia: “Síntome máis libre”. Este era o espírito de nación e irmandade que se respiraba onte na Praza do Correxidor con motivo da manifestación en defensa da lingua organizada por “Queremos galego” . Dende ben cedo, foron sucedéndose actos diversos nos que non faltaron integrantes e cabezas de lista para as próximas eleccións. En Melias (Pereiro), ás 11 da mañá, destapouse unha placa conmemorativa na casa de Casdemiro, onde naceu o Padre Feijóo. Este ilustre literario recolleu nos seus poemas momentos históricos, como o desastre da Frota da Prata, un cruento combate naval contra os ingleses que sucedeu en Rande, na ría de Vigo, no ano 1702. “O idioma é a chave coa que abrimos o mundo, o salouco máis feble, o pesar máis profundo”, escoitábase ás 12 de mañá na manifestación pola lingua. O poema “A fala”, de Manuel María, foi un dos moitos textos que se lembraron ao longo do día, e só un dos que se recitaron na manifestación pola defensa da lingua. Celso Emilio Ferreiro, Rosalía de Castro, Ramón Otero Pedrayo e por suposto, Eduardo Pondal, coa letra do noso himno, volveron a vida por uns instantes na data que aloumiñou os corazóns de todos os galegos. A música non faltou á cita para complementar ó movemento cultural. En Barbadás, por exemplo, tivo lugar a II Foliada das letras, cun desfile a mediodía pola Avenida de Celanova da Banda de Música Municipal e Nova Fronteira, que rematou nun concerto de coros e unha sesión vermú. Xa de tarde, o baile tradicional fíxose un oco ó son de pandeiretas e aturuxos. Ó mesmo tempo, na cidade de Ourense, tiña lugar un concerto da gaiteira Susana Seivane na Praza Maior.