As fundacións ligadas á revista “Nós” e a Coral de Ruada organizan o acto este sábado
A Fundación Otero Pedrayo e a Coral de Ruada organizan mañá unha homenaxe á figura de Xavier Prado "Lameiro", que segundo explicou Samuel Lago, director da agrupación musical, "foi o fundador da Coral de Ruada, a que lle puxo nome".
Pero xunto a súa faceta musical, Prado "Lameiro" uniu outra non menos importante "como escritor e xornalista, que quedou en parte solapada pola súa coexistencia con nomes tan destacados das letras galegas naquel tempo como Castelao, Vicente Risco ou Otero Pedrayo", sinalou o profesor Delfín Caseiro, que se encargará mañá de ler a "laudatio" sobre a figura do homenaxeado nos Xardíns de Ou Posío, que acollerá o acto ás 12,00 horas.
Os organizadores apuntaron na presentación que esta homenaxe, que contará tamén cunha actuación da Coral de Ruada, ten dous obxectivos fundamentais: reivindicar a figura de Prado "Lameiro" e o seu relevante papel en defensa da xente do mundo rural que naquela primeira metade do século pasado era maioritaria na provincia, e que o acto sexa unha antesala das celebracións que en 2020 se prevén con motivo do centenario da revista "Nós".
