Luis Menor: “Os votos pídense e logo débense. Cumpriremos coa palabra dada”

Luis Menor (Pereiro de Aguiar, 1964) leva case cinco anos de alcalde de Pereiro, medio ano á fronte da Deputación e tres meses liderando a xestora provisional do PP na provincia. Os resultados das autonómicas na provincia, co 49,9% dos votos válidos e 3.000 votos máis, que lle permitiron amarrar o oitavo deputado, déixano “moi satisfeito” e preparado para asumir a presidencia do partido no congreso dos populares. “Haberá congreso, por suposto. Sen dúbida ningunha este resultado avala o proxecto e as ganas de ser presidente provincial do partido. Eu quedo moi satisfeito”. El PP se mantiene en la provincia de Ourense, y el PSOE registra su peor dato Durante semanas percibiuse o medo no PP a perder a absoluta en Galicia. Era esa a sensación interna? Queda Rueda totalmente avalado? Non exactamente nervios, había tensión, porque evidentemente estabamos nun escenario moi complicado. É certo que baixamos algo máis do tres por cento, pero subimos máis de 3.000 votos. Pero todo iso nun contexto no que houbo un relevo autonómico, que penso que quedou aprobado con sobresaliente. Tamén houbo un relevo a nivel provincial, cunha xestora que deixou o partido en interinidade e tamén había unha situación que contaminaba todo como é a presenza dunha forza que hai catro anos nos apoiou a nós e agora foi un competidor. Obviamente, isto deixou un escenario aberto e o resultado que sacamos é para valorar moi positivamente. Seguimos sendo a segunda provincia en porcentaxe de apoio, e cun escenario que non teñen outros. É moi de valorar o resultado neste contexto. Tendo en conta ese nivel de interinidade, e sendo vostede presidente da xestora cun congreso do partido ás portas, podemos dicir que Menor se fixo maior con este resultado? Eu quedo moi satisfeito. Sumamente agradecido cos compañeiros do partido, que fixeron un extraordinario traballo de mobilización. En reunións comarcais, actos de campaña e no colofón final dos Remedios, que había moitos anos que non se facía. Iso revela que temos moita forza e síntome moi satisfeito co apoio, cariño e implicación máxima dos compañeiros. O PP arrasa na provincia pero aínda así é a na que máis cae o apoio. Débese a algún tipo de castigo? Temos máis votos, é certo que menos porcentaxe. Non fomos nin moito menos os máis damnificados. É obvio que a irrupción dunha forza de carácter local e populista tivo unha audiencia do 9% e a pesar diso seguimos a ter o 50% dos votos. Iso reflicte a nosa forza. Imaxinemos que este contexto se trasladase a outras provincias, a ver se todos resistirían como nós polo oitavo deputado. Queda reforzado o papel do PP como o partido de Ourense? Reivindicar a provincia débeno facer todos os partidos, pero hai maneiras de facelo. En primeiro lugar, creo que quen temos a obriga e a convicción de reivindicar a provincia de Ourense somos o partido clarisimamente ganador. A mostra de forza e apoio é moi claro nestas eleccións, polo que pedimos respecto igual que respectamos aos demais. Seremos absolutamente belixerantes con quen se arrogue representacións populares ou reivindicacións da provincia que non lle corresponde co apoio electoral. Ninguén nos vai gañar en traballo. Iso que o teñan seguro todos os que nos apoiaron e todos os que non nos apoiaron. Ninguén vai reivindicar nin vai ter máis forza e capacidade de conseguir eses obxectivos que o partido que foi quen de contribuír de maneira decisiva a que Alfonso Rueda siga a ser o noso presidente da Xunta. Agora toca cumprir co dito na campaña. Vostede asinou un compromiso con Rueda, 12 feitos concretos a poñer en marcha na provincia. Haberá que estar vixiantes? Estou totalmente convencido de que se cumprirán. Nós quixemos mandar unha mensaxe diferente. Un pode facer grandes frases, reivindicar cousas que soen moi ben… Pero logo está a realidade! E a realidade é que nós puxemos negro sobre branco un compromiso firmado polo que vai ser o presidente e polo que vai ser o presidente do PP de Ourense. E é un compromiso público de que se vai executar. E eu invito a que se estea pendente dos mesmos, pero non fará falta, porque os primeiros que estaremos pendentes da súa esixencia somos o PP de Ourense. Debe ser esta a lexislatura da discriminación positiva con Ourense? Loitaremos por que a Ourense se lle dea o máximo que se lle pode dar, o que desde logo nos corresponde. O noso compromiso é tamén o compromiso do presidente da Xunta. É o compromiso da Xunta con Ourense. Dicía na campaña que os votos pídense e despois débense. Cando falamos de deber, e falo desde a miña experiencia de alcalde, é que cando alguén che dá a confianza é a cambio de que ti cumpras a palabra dada. E nós temos que cumprir a palabra dada, e somos os primeiros interesados para volver pedir o voto con máis forza se cabe. Ourense ten os 12 concellos de Galicia con máis apoio ao PP, pero hai un lunar na cidade. Son a forza máis votada pero déixanse máis de seis puntos. Hai unha lección que sacar? Hai que cambiar a forma de traballar? Subimos en votos respecto da convocatoria anterior. Obviamente, aínda son os resultados que nós queremos na capital. Pero o partido que goberna pasou de case 20.000 nas municipais a 10.000 votos e nós pasamos de 14.000 a algo máis de 22.000. Iso reflicte que o primeiro partido, tamén na capital, somos nós, e iso non significa que non fagamos autocrítica. Hai moitísimo voto que recuperar e o resultado de onte danos moita esperanza. Hai moitísima marxe e nestas eleccións moitísima xente na cidade volveu coller a papeleta do PP. Esperamos que esa xente se manteña e recuperar todo aquel que nos apoiou nalgún momento. Queremos volver ser a primeira forza nas municipais na capital, somos unha forza de goberno. Pasaron as autonómicas, o PP está liberado, iso fará que cambien as tornas no Concello de Ourense ou é política ficción? Non toca falar diso. Toca analizar estas eleccións e despois o que sempre dixemos. Temos dúas premisas claras. Nós sempre estamos a favor da cidade de Ourense. Calquera proxecto que se impulse en favor da cidade será apoiado polo PP. E nós promoveremos como partido de goberno eses proxectos. E o segundo condicionante é que se cumpran coas formalidades e requisitos de legalidade, de facer ben as cousas. A partir de aí, todos os escenarios están abertos para todo o mundo. O que nos interesa é que se traballo ben Ourense, sexa con quen sexa. Sae reforzada esta nova etapa na Deputación, marcada polo diálogo e entendemento coa oposición? Séntese avalado? Está claro que estamos moi satisfeitos dos resultados e non son ningunha emenda, senón un claro refrendo das nosas políticas. Esa vía de diálogo e entendemento sempre estará aberta, é unha premisa do equipo de goberno. Se estes resultados, inda que non sexan extrapolables, se os tivésemos obtido nas municipais teríamos unha maioría máis que absoluta na Deputación, polo que creo que estamos no camiño e correcto.