A localidade ourensana de Maceda acollerá este sábado, 4 de xaneiro, unha gala benéfica co obxectivo de recadar fondos para unha nena de cinco anos con parálise cerebral.
O evento para axudar á familia de Xiana Vázquez contará cunha carpa climatizada, onde ao longo de toda a xornada se realizarán actividades e concertos.
Así, segundo informan os organizadores do evento, de 11,00 a 13,00 horas realizarán actividades para os nenos organizadas por Cruz Vermella, con chocolatada gratis para eles e cafés e doces para os que asistan.
Tamén pola mañá estará a Banda de Gaitas de Maceda e un dúo de pianistas e cantante con proxeccións. De 15,00 a 16,30 horas seguirán as actividades para os nenos e ás 16,30 está prevista a actuación do Mago Chirleta.
A partir das 17,30 horas haberá distintos concertos. Entre grupo e grupo haberá sorteos de cousas doadas polos locais colaboradores de Maceda e arredores, como cestas con produtos caseiros, vales desconto en salóns de peiteado e roupa, unha comida e unha cea no restaurante Teixería de Maceda.
