O xurado, que se reuniu este venres, recoñeceu da obra de Patricia Román a "orixinalidade das ilustracións", que se "adaptan moi ben ao texto"
A ilustradora Patricia Román Ortega, orixinaria de Cidade Real, resultou gañadora por segundo ano consecutivo do premio 'Pura e Dora Vázquez' de ilustración infantil e xuvenil, que convoca a Deputación de Ourense e que está dotado con 1.500 euros.
O xurado, que se reuniu este venres, recoñeceu da obra de Patricia Román a "orixinalidade das ilustracións", que se "adaptan moi ben ao texto" premiado na modalidade de literatura e axudan a "narrar a historia". Ademais, destacou a técnica empregada para a realización das ilustracións e a calidade en conxunto da obra. Román Ortega tamén conseguiu este mesmo premio en 2014.
O xurado estivo presidido polo deputado de Cultura da Deputación de Ourense, Avelino García, e integrado polos vogais María Rosa González Méndez, Luis Gulín Iglesias, José Manuel Fernández López e Xosé Manuel Cid Fernández.
Os traballos de ilustración presentados ao certame, de diferentes estilos e temáticas, baseáronse no texto gañador do premio de narración, 'Bicha', da coruñesa Eli Ríos.
