Nuria Iglesias: "O 40% dos nosos socios facturan entre 100.000 e un millón de euros"

AJE Ourense celebra este xoves a XI edición dos seus premios para os empresarios mozos de Ourense. A súa presidenta, Nuria Iglesias, fai unha análise do emprendemento da mocidade ourensá.

Leva case dous anos como presidenta de AJE, cal é o balance?

Dous anos tolos. Saímos dunha pandemia, arrancou a guerra… a sensación é de incerteza, pero tamén de constante renovación e dunha busca constante de alternativas.

Cal é o obxectivo dos premios?

Poñer en valor o traballo os empresarios mozos e darlle un recoñecemento. Por outra banda, este ano Cogami recibirá o premio de compromiso social.

Falemos de AJE en cifras.

En 2021, AJE tiña 140 asociados, con 830 postos de traballo, un volume de facturación de 40 millóns de euros e o 40% dos nosos asociados facturan entre 100.000 e un millón de euros. Exportamos a 18 países. Os cinco sectores máis representativos dentro de AJE son o agroalimentario, que ocupa o 18%; a comunicación, o comercio local, a hostalaría e a saúde. Respecto aos datos de 2022, a tendencia á alza é constante e as cifras serán similares. Cada vez hai máis perfís femininos que abren o seu propio negocio.

Cal é o perfil do mozo emprendedor ourensán?

Son moi variados. O que todos comparten é a innovación nas súas distintas facetas. Revolución de procesos artesanais, dixitalización… Esa é a base común.

É a innovación e a dixitalización a forma de abrir camiño?

Se algo bo nos trouxo a pandemia é que podemos vender en calquera parte do mundo. Así, a través de internet e coas facilidades de vivir nunha provincia coma a nosa temos a posibilidade de facer o que queiramos.

Con todo, a tenda física aínda ten moito peso.

Obvio. Hai que facer unha mestura. A todos nos gusta tocar o produto e o trato con persoas. Un exemplo son as adegas do Ribeiro ou da Ribeira Sacra, que se están a especializar no enoturismo porque á xente gústalle coñecer como se elabora o viño que eles degustan nas súas casas.

Como afecta a conxuntura económica aos que están pensando en abrir un negocio?

Non é a dificultade que poidas ter hoxe, é o que poida xurdir mañá. Agora mesmo é imposible previr como vas estar de aquí a un ano. O incremento dos prezos do gasóleo, os retrasos do transporte… Emprender hoxe non é un camiño recto. Antes tampouco era doado, pero era máis sinxelo facer unha previsión.

Relacións empresas-institucións. Como está esa situación en materia de axudas, de burocracia…

En AJE temos unha filosofía: tentar vivir sen subvencións. Están moi ben, pero se alguén pensa que vai montar unha empresa en base ás subvencións dispoñibles non vai polo bo camiño. Tes que ter claro o teu modelo de negocio, e sumar estas axudas como algo adicional. Como montes algo pola axuda que teñas, seguramente vas fracasar. Noutro senso, as relacións non son fáciles. O propio funcionamento da administración está lonxe do empresario.

Que medida lle reclamaría ao alcalde de Ourense, ao presidente da Xunta e ao presidente do Goberno?

Á alcaldía, estabilidade. É un sentir popular. Nos demais estamentos, pedimos que se escoite ao empresario. Agora fálase moito do traballador, que obviamente tamén é moi importante, pero creo que se olvida ao autónomo. Deberían pisar máis a rúa.

Están a chegar os Next Generation aos emprendedores?

Está moi complicado para o perfil de asociado de AJE. Non está chegando aos emprendedores. Outra vez máis, coma sempre, esquécese ao pequeno.

É o emprendemento a forma de revertir o envellecemento e o despoboamento de Ourense?

É unha parte. Debemos cambiar a mentalidade e temos que inculcar aos nenos que en Ourense hai futuro; as administracións teñen a obriga de atraer proxectos, como a axencia de IA, que deixamos pasar; e o empresariado ten que estar á altura da situación.

Non ve contraditorio o da IA?

Por suposto. A aposta da descentralización ten que ser real, non só un lema. Non podes dicirlle á xente que viva no rural cando alí non hai servizos.