Os numerosos actos que se viviron na cidade con motivo do Día das Letras Galegas mantiveron viva a figura de Díaz Castro, nunha xornada na que Viana do Castelo amosou a súa cultura cun sonoro e colorido desfile
As Letras Galegas invadiron Ourense. A cidade acolleu numerosos actos no día en que toda Galicia homenaxea á súa lingua propia, e nos que toda a cidadanía amosou dende a rúa os grandes sinais de vida que segue a ter o galego.
A figura do recordado Xosé María Díaz Castro estivo especialmente presente na meirande parte da xornada festiva de onte. Os libreiros, que instalaron unha carpa na rúa do Paseo, difundiron a obra do poeta de Guitiriz, que foi lida en varios dos actos do Día das Letras.
Así, a Plataforma "Queremos Galego" celebrou en Ourense un dos sete actos que organizou por toda Galicia. Os xardíns do Bispo Cesáreo foron o escenario dunha lectura de textos de Díaz Castro, unha exhibición de grafite de D. Vieira e a lectura dun manifesto no que se reivindicou un maior emprego da lingua en tódolos ámbitos da vida.
Pola súa parte, o PSdeG ourensán realizou un roteiro polas rúas do Casco Vello no que recordou a figura dos grandes autores en lingua galega que deu a cidade, en especial a aqueles pertencentes á Xeración Nós, como Vicente Risco ou Antón Losada. Os socialistas realizaron unha ofrenda floral no busto a Eduardo Blanco Amor, tamén nos xardíns do Bispo Cesáreo.
Máis ruído se oiu no desfile que transcurriu entre a Praza Maior e a rúa do Paseo, e onde a localidade portuguesa de Viana do Castelo promocionou a súa festa da Nossa Senhora da Agonía. Gaitas, tambores e traxes típicos tinxiron de cor e son o centro da cidade, abraiando aos viandantes que aproveitaron a xornada de sol e calor. A música tamén se escoitou na praza de San Martiño, cun concerto especial ao aire libre da Banda Municipal ao que seguiu unha lectura de poemas de Díaz Castro.
