A provincia de Ourense presume de lingua no Día das Letras Galegas

En cada recuncho da provincia de Ourense celebrouse o Día das Letras Galegas, adicado este ano a Francisco Fernández del Riego. Xa sexa presumindo de lingua, cunha bandeira galega, cun paseo pola natureza ou dunha maneira máis institucional: numerosos actos coparon as principais vilas de Ourense, con baile tradicional, concertos, obras de teatro ou galas músico-literarias.

Na comarca de Monterrei, Verín foi o epicentro dos eventos coa tradicional gala músico-literaria na que se recitaron os poemas gañadores do certame de poesía Xosé Carlos Caneiro e se leron os relatos gañadores do certame de relato curto Antonio Fernández. A cita non faltou o alumnado do Conservatorio de Verín, que encheu o Auditorio de música. Na comarca veciña de Conso-Frieiras, A Gudiña celebrou a festividade con contacontos e foliada, mentres que Viana desfrutou do espectáculo “Contos, cantos e poemas” de Xosé Carlos Caneiro e Emilio Rúa.

Xinzo de Limia acolleu o acto de entrega dos premios do VII Concurso literario de narrativa curta e dos concursos de debuxo da Fundación Carlos Casares, así como a presentación da nova edición en ucraíno de “A Galiña Azul” de Casares.

Pola súa banda, na comarca de Valdeorras a actividade literaria xa leva uns días en marcha. Hoxe, en A Rúa houbo unha exposición de libros, ademais do concerto “Galicia Nai”. En Córgomo (Vilamartín) homenaxearon ás Letras cunha feira de produtos tradicionais, mentres que en O Barco os cativos desfrutaron dun contacontos no Teatro Lauro Olmo.

Festexos e música

Tamén Trives festexou por todo o alto o día da lingua:con música da man da banda de gaitas Os Trintas de Trives, os pandereteiros Os do Fondo da Barra e o grupo Orfeón trivés acompañado dun recital. Unha xornada cargada de música para amosar o poder do galego e da súa cultura. Os festexos tamén chegaron a Allariz, onde os cativos e maiores gozaron dun espectáculo de Xoán Curiel, “Cantando as nosas letras”.

Por suposto, Ribadavia non faltou á cita cun día cargado de eventos.O grupo de baile e música tradicional Sadeo -que actuou ao mediodía na Praza Maior- abriu o acto de conmemoración do 50 aniversario da I Mostra de Abrente. Os cativos tamén tiveron o seu espazo coa obra de teatro “A teima de Xoana” de Valparaíso e “A escola de Dona Lola” de Anaquiños de Francelos.

A provincia culmina o 17 de maio cos actos máis amplos, aínda que durante toda a semana hay numerosas vilas que teñen organizados descontos ou agasallos de libros para impulsar a lingua e dinamizar a lectura en galego.