O PSdeG de Ourense aposta por un proxecto para a provincia que recupere os piares básicos que “o PP destruíu a base de recortes e desmantelamento”. Os socialistas fíxanse como obxectivo recuperar unha sanidade pública “digna e de calidade”, apostan pola mellora das infraestruturas autonómicas na provincia e teñen un plan para loitar contra a “grave” crise demográfica que padece Ourense, tras anos de “desleixo e abandono” dos populares, que só provocaron “a marcha de ourensáns cualificados”. A candidatura ourensá aposta tamén por “melloras no transporte e na industria, un plan de vivenda, xerar emprego de calidade, reforzar a educación, protexer o medio ambiente, rescatar o termalismo do ostracismo ou potenciar o sector primario e forestal”. Así o manifestaron nun almorzo informativo, no que defenderon a Besteiro como un líder que “coñece ben o interior e as súas grandes eivas”.
Diferenzas co PP
A candidata do PSdeG-PSOE de Ourense, Carmen Rodríguez Dacosta, salientou durante a súa intervención os “contrastes” entre cando goberna o PP e cando o fai o PSOE. Puxo como exemplo que fronte “a desidia, o abandono, o conformismo e a parálise do PP na Xunta”, atópase o Goberno encabezado por Pedro Sánchez que aposta “pola suba das pensións, fomentar o aumento da afiliación á seguridade social, o incremento do salario mínimo interprofesional, os abonos de transporte gratuíto, as becas, o bono social ou o ingreso mínimo vital”.
Tamén onte, o secretario xeral do PSdeG, Valentín González Formoso, visitou Valdeorras, onde defendeu a aposta por “multiplicar”o investimento en servizos públicos e infraestruturas para “reequilibrar” a Galicia interior”: “Outra provincia de Ourense é posible”.
