Santádega, unha banda musical que fai canteira

O Festival de Bandas de música de Primavera de Coles arranca esta fin de semana, no auditorio municipal, co concerto da banda de música Ateneo Musical de Negreira. Este é un evento consolidado no calendario cultural e que adoita ser un éxito de afluencia. A organización corre á conta do Concello e máis da banda de música Santádega. O alcalde, Manuel Rodríguez, indica que organizar un evento deste estilo -que xa vai pola cuarta edición- é grazas á recuperación desta banda de música, algo que foi posible gracias “ao impresionante traballo de Humberto Cao”, primeiro director da banda e impulsor da escola de música. “Cando comezamos en 2009 non habería nin 10 alumnos, agora ten preto de 90”, resalta Rodríguez, quen explica que o obxectivo era “recuperar a tradición musical que había no concello”. Aínda que nun primeiro momento esta banda ía pertencer á mancomunidade, quedou soamente adscrita ao concello de Coles, que é a institución que mantén a súa viabilidade económica. “Isto non é máis que dar visibilidade ao traballo que se fai aquí a prol da música”, conclúe. Roberto Iglesias é o director da banda e da escola de música dende 2015. Veciño de Ourense, explica que “cando cheguei, a escola non tiña moito alumnado e a banda estaba moi mermada, tamén hai que entender que unha banda non se forma nun día. A partir de aí, comezamos a traballar un grupo de profesores moi bo e ampliamos a nosa oferta e fomos atraendo a máis xente, ata que en 2019, a banda infantil gañou na súa categoría o XIII Certame Galego de Bandas de Música”. Agora, na escola son máis de 90 alumnos, na banda suman 55 e na infantil outros 20, o que resulta en máis de 150 perosas, algo que “enche de orgullo” ao director da banda, que compaxina isto coa súa propia escola de música. A finalidade da escola vai máis alá da formación, xa que é a principal canteira de Santádega. “Sempre lle digo ao meu alumnado que entre na banda se lle apetece, xa que é unha experiencia moi bonita”, asegura. Tamén os que forman parte da banda infantil, “cando van collendo nivel e se lles interesa, poden pasar á banda grande”. Alén disto, para Iglesias é “un orgullo” ver como “os nenos pasan e crecen contigo como profesor incluso ata chegar a ser profesionais da música”. En resumo, Santádega e unha “institución” musical no concello de Coles e a comarca de Ourense, xa que participan na maioría de eventos organizados na zona, aportando “diversión e alegría”, xunto coas outras agrupacións musicais que existen no concello -tres corais ou un grupo de pandeireteiras-. Tamén indica que agora, dende a escola, a través dun profesor, traballan dende hai dous anos “na creación dunha banda tradicional de gaitas con percusión tradicional”.