A UVigo celebrou o pasado venres a súa primeira andaina trala pandemia, na que participaron máis de 80 persoas -a maioría procedentes da provincia de Pontevedra-, polo que os organizadores consideran que “o reto superouse con éxito”. A ruta comezou na capitalidade do concello do Pereiro, pasando polo encoro de Cachamuíña, a ruta dos muíños e a Chaira para rematar de novo na praza do concello. O alcalde, Luis Menor, fixo a primeira parte da ruta e mantivo un pequeno encontro cos organizadores, aos que lles agradeceu a súa visita e dos que salientou que “quedaron cunha magnífica impresión e prometeron voltar en sucesivas ocasións”.
30.000 EUROS PARA RUTAS
Ademais, o Concello do Pereiro de Aguiar recibiu preto de 30.000 euros de subvención da Xunta para acondicionar máis de 50 quilómetros de roteiros de sendeirismo. As actuacións concentraranse en tres grandes áreas: o roteiro da Sicenata-Castelo de Parada-Melias, a de Covas-Triós en dirección ao mosteiro de San Pedro de Rocas e a dos Muíños do Grañal.
“Tres sectores do noso territorio quedan incorporados á rede de roteiros do concello, que acadan así unha extensión de máis de 50 quilómetros nas portas da Ribeira Sacra e preto da capital”, valora o rexedor. A axuda do goberno autonómico permitirá acabar os traballos que xa se estaban executando nestas zonas, ademais da sinalización e a posta en valor destes atractivos turísticos naturais. “Esta concesión inmediata permítenos culminar e por en valor un traballo que vimos realizando nos últimos tempos para salientar os nosos principais recursos”, engade Menor.
As tres áreas de actuación “permitirán coñecer o noso pasado, o patrimonio, a paisaxe… co pano de fondo do Miño”, din desde o Concello de Pereiro de Aguiar.
O rexedor do Pereiro pon en valor estas subvencións que axudarán a “complementar” os atractivos turísticos do concello. Así, o encoro de Cachamuíña “recibe cada día máis persoas, como por exemplo, esta andaina da Universidade de Vigo”. Tamén colle impulso o roteiro dos muíños do Loña, “que desde que abriu hai dous anos non para de medrar en extensión e usuarios”. n
