Villarino: "Para cambiar esta provincia fai falta a cidade, e o meu desexo é a alcaldía”

Desde o mirador de Montealegre, Rafael Rodríguez Villarino (Ourense, 1965), asegura que ve unha cidade que non é a que desexaría, motivo polo que lle gustaría en 2023 converterse no alcalde de Ourense. Reforzado pola súa contundente victoria nas primarias socialistas, ve o seu partido como “a única alternativa” para conseguir o cambio no Concello de Ourense en na Deputación provincial. Estamos en Montealegre, un recurso un tanto desaproveitado. Cre que Ourense non aproveita o seu potencial? Dende hai anos Ourense só ten iso, potencial. O que non ten son persoas que o leven adiante. Non ve a cidade que desexaría, entendo. Obviamente non, ten que ter uns cambios xerais. Por que? Se vemos o centro, o que antes era unha zona comercial en auxe agora está case paralizada. Se cruzamos á Valenzá, hai negocios abertos, con actividade. Que está pasando nesta cidade? A xente estase desapegando dela. Na rúa escoitase todos os días que isto non pode seguir así. Gañou en 2019 pero quedou sen nada. Superou a frustración? Pero falaría de frustración colectiva, porque houbo un rexeitamento ó modo de facer política na cidade e na provincia e capitalizámolo moitos partidos, en maior medida o PSOE, pero tamén DO, que se postulou sempre contra un xeito de facer as cousas. A xente esperaba un cambio que non só non se produciu, senón que se acentuou o que había. Da inacción pasamos ó caos absoluto. Está preparado para 2023? Necesitaremos forzas cunha visión semellante, pero somos a única alternativa. Se houbese unhas eleccións hoxe en Ourense, habería un resultado claro a favor dun cambio. Con Villarino de candidato? O PSOE ten os seus procesos. Cando chegue ese momento, tomarei a decisión. Pero o certo é que me presentei ás anteriores eleccións, gañouse con claridade e noto o apoio nas rúas. A xente dime que ten gañas de que haxa un cambio de goberno e sinálanme. Alcaldía ou Deputación? O desexo persoal de Rafa Villarino é ser alcalde de Ourense, a Deputación ten outro alcance. Sería enganar a Ourense presentarme como candidato á Alcaldía para despois situarme noutro lugar e eu nunca enganaría a Ourense. Como secretario provincial, teño a responsabilidade de obter os mellores resultados na provincia e na cidade, que é clave para obter tamén a Deputación. Hai voces, tanto dos seus críticos como afíns, que non ven ben a súa sobreexposición no Concello e na Deputación. Ese é un falso debate, parece que somos Manuel Baltar. Ninguén se presenta como candidato á Deputación, o que existe é un candidato a alcalde ou concelleiro. Pero non ve inasumible ser alcalde da cidade e presidir a Deputación? Se a pregunta é esa, nunca tería os dous cargos, sería unha falta de responsabilidade. A cidade esixe dedicación plena, o goberno non é compatible con nada máis. Agora mesmo son voceiro no Concello e na Deputación por distintos motivos, pero iso é circunstancial. Polo simbolismo que tería, non vería un éxito liderar a Deputación? Si, pero vai unido coa cidade, non se poden separar. A Deputación é un organismo que debe xogar o seu papel en lugares con poucos recursos. Pero o realmente necesario para cambiar a provincia é a cidade, esa é a maior responsabilidade que se pode ter en Ourense. Baltar ou calquera presidente da Deputación ten un papel moito máis secundario. O mandato rematará tal como está xa, sen moción de censura? O PSOE puxo todo a favor para ese cambio e o PP encárgase cada día de dicir que non. O único responsable da situación actual é o PP, non hai ningún máis. É o que sitúa a Jácome e o mantén, a pesar de que os denoste cada día, faga o que faga. Dicía Trump que podería saír á rúa e pegar cinco tiros e seguiría sendo presidente. Jácome podería facer o mesmo e seguiría sendo alcalde. Ten relación con Baltar? Non, el non quixo e mantense. Tamén entra en campaña incluso nas primarias socialistas posicionándose por outro compañeiro. Axudoulle iso? Sen dúbida, pero eu non llo pedín (risas). El saberá por que o fai. Creo que pensa, nun erro político máis, que me faría dano. Iso dime que son un socialista que está actuando ben. É o momento de quitar estorbos, de xente que impide o desenvolvemento da provincia. Ademais el non ten a valentía de asumir a culpa do que pasa na cidade, senón que as bota no grupo municipal. Tampouco parece cousa de Alberto Núñez Feijóo. Se o PP é un partido sen responsabilidade, que fai gobernando? Hai xa data para renovar a executiva local do PSOE? Entendo que o primeiro fin de semana de marzo. Vese reforzado a nivel orgánico na cidade? A última votación foi bastante clara ó respecto, a militancia falou. Non está en discusión a forza do partido. Gustaríalle que o secretario local fose Xosé Rúas? Sería un magnífico candidato. Só podo dicir cousas boas del. Que tal a relación con Formoso? Vostede foi con Caballero. É cordial, o clima é bo. Non é todo o fluído que nos gustaría porque está arrincando. Imos poñernos xa a traballar en liña para as municipais. Que lles levou a cambiar o voto coa residencia de maiores? Nunca estivemos en contra da residencia, só nos facíamos eco dos veciños. Despois, pese a non ter o compromiso que nos gustaría, si tivemos imaxes de como vai ser e o compromiso da conselleira. Os veciños mostráronse satisfeitos e é o que respectamos. Apoiamos algo que cremos beneficioso para Ourense. Equivocáronse na estratexia e viron un dano electoral? Non, precisamente estivemos expostos a un dano por representar á xente. Non foi unha decisión electoral, o demagóxico sería dicir si a todo cando sabiamos que os veciños estaban pedindo outra cousa. Cando conseguen o que queren, estamos ó seu lado. Terá listas nos 92 concellos? Non presentaremos porque si, senón onde exista apoio. O relevante é o impacto que poidamos ter, un papel digno para optar a ese cambio provincial. Os actuais gobernos que temos están consolidados e, por exemplo, Elvira Lama vai ter unha subida importante en Xinzo. Hai runrún en Celanova de que poden fichar ó alcalde. Non existen contactos para que sexa o candidato, si hai moi boa relación. É difícil facer agrupacións en determinados lugares? Hai concellos nos que aínda existe xente con medo a poñerse nunha candidatura alternativa ó PP. É algo que me choca a estas alturas. Que pasa en Melón? O seu alcalde quedou sen edís. Non dá boa imaxe. Pero creo que a xente distingue unha cuestión interna de algo municipal. Emilio (o alcalde) loitou anos contra unha saga familiar corrupta do PP para darlle un futuro a Melón. Liberou de corruptelas ese Concello e traballa arreo. Cuestión distinta é esa disensión interna. A situación mudará cos novos concelleiros. O PP si é nocivo en Melón.