A Xunta promove tres sendas para mellorar a seguridade vial

O delegado territorial da Xunta en Ourense, Gabriel Alén, informou onte do inicio do proceso polo que se somete a información pública o proxecto dos itinerarios peonís e ciclistas que a Xunta ten previsto executar nas estradas autonómicas OU-105, OU-536 e na avenida de Ponferrada, no concello de Ourense, e que suporán un investimento autonómico de máis de 1,8 millóns de euros. Estas actuacións, que terán un prazo de execución de seis meses unha vez iniciadas as obras, necesitarán da expropiación de 45 fincas para executar o proxecto. A intervención ten por obxectivo actuar en zonas destas estradas autonómicas que carecen na actualizade dun espazo seguro para o tránsito de peóns, polo que suporá unha mellora da seguridade viaria dos veciños. As persoas interesadas en facer achegas a este proxecto dispoñen dun período de 30 días hábiles, contados a partir da xornada seguinte á da publicación no Diario Oficial de Galicia, para formular propostas. SENDA DE REZA En canto ao controvertido proxecto da senda de Reza, e logo de tres anos de mobilizacións dos veciños en contra da súa execución, chegando a asistir ao pleno en ton de protesta, mostraron onte nunha votación en asemblea a súa total negativa á iniciativa, agardando que a Xunta o desbote de forma definitiva. Os veciños defenden que os prexuízos son maiores para as súas vivendas e terreos que a utilidade da mesma, e agradecen a Gabriel Alén o seu “diálogo, explicacións e atención”. O propio Alén expresou que “consideramos que é un proxecto bo para ese entorno, e que pode ser moi positivo para garantir a seguridade peonil, pero non imos facer algo contra a vontade popular, sería un sen sentido. Aínda non se tomou unha decisión ao respecto, pero analizaremos a situación e buscaremos unha solución para todos. Buscaremos un punto no que todos estemos de acordo de que os beneficios son maiores que os prexuízos”.