Os ceos estarán anubrados, con precipitacións débiles tipo orballo
As altas presións continuarán estacionarias ao norte da península Ibérica, pero permitirán a entrada dunha fronte moi desfeita, que afectará sobre todo ao norte de Galicia.
Deste xeito, segundo a información de Meteogalicia, os ceos estarán anubrados, con precipitacións débiles tipo orballo, máis probables cando máis ao norte; mentres que no sur, os ceos permanecerán pouco anubrados ou despexados.
O parte meteorolóxico recolle que, cara á noite, comezarán a entrar as nubes baixas polo sur da Comunidade galega. As temperaturas sufrirán un descenso, máis acusado nas máximas, que serán de 21 graos en Ourense e Pontevedra e 20 en Vigo. O vento soprará frouxo de dirección variable en xeral.
