Proporcionar unha visión dos problemas, retos e solucións sobre a propiedade intelectual na Universidade é o obxectivo principal do curso virtual "Propiedade intelectual e persoal docente universitario", que a Área de Formación e Innovación Educativa promove no marco do Programa de Formación Permanente do PDI. Aberto a un máximo de 30 participantes, o obradoiro, que pechará mañá, día 30, o seu prazo de matrícula, está destinado ao persoal docente e investigador, aínda que poderán tamén participar outras persoas interesadas no caso de quedar prazas libres.
A actividade desenvolverase os días 5, 7, 12 e 14 de maio en horario de 16,30 a 18,30 horas de xeito telemático. A finalidade é "formar ao persoal docente universitario en todos aqueles temas de propiedade intelectual que lle afectan; dende a xeración de contidos, o plaxio, os repositorios institucionais, as licencias Creative Commons, a utilización de contidos de terceiros na docencia e na investigación ou a explotación de resultados de investigación, entre outros", sinala o docente do obradoiro, Carlos Gómez, secretario xeral adxunto da Universidade de Santiago de Compostela.
O curso comezará cunha introdución á propiedade intelectual para ir afondado en temas como a titularidade dos dereitos de propiedade intelectual nos distintos colectivos universitarios, as licenzas de uso libro, os límites dos dereitos de propiedade intelectual no que se refire a citas ou a explotación dos dereitos de propiedade intelectual xerados polo persoal docente, entre moitos outros aspectos.
Todos os coñecementos do curso "son aplicables no día a día do profesorado" xa que afectan ó material didáctico, á titorización de proxectos ou á elaboración de materiais de investigación, salienta Gómez.
