Con novos cursos de alemán para empresa e de preparación para o exame de inglés para os negocios
Aínda que os cursos máis demandados no Centro de Linguas seguen a ser os de inglés nos diferentes niveis e o de español para estranxeiros, nos últimos anos estase a constatar un crecente interese polos cursos orientados ao mundo empresarial e laboral.
Por iso, no curso que arranca o Centro de Linguas apostou por esta vía e estrea un curso de alemán para a empresa e un curso de preparación para o exame Business Preliminary, proba de nivel B1 de inglés para os negocios de Cambridge. As outras novidades para este ano académico son o curso de preparación para o exame DEPLE (Diploma Elementar de Portiguês Língua Estrangeira) e o curso de mantemento de inglés C1.
De feito, as cifras do pasado ano amosan que, ademais do inglés e o español, os cursos con mellor acollida foron, como destaca Esperanza Rama, directora do CdL, os centrados na preparación para a carreira profesional, “como o de alemán de supervivencia, o de inglés profesional para facilitar o acceso ao mercado laboral, impartido en colaboración co Consello Social, ou o curso de iniciación á ensinanza do español como lingua estranxeira, en colaboración co Instituto Cervantes”.
En total, entre cursos intensivos, cuadrimestrais e de preparación de exames, o Centro de Linguas chegou no pasado curso aos 3000 usuarios matriculados: 1100 no primeiro cuadrimestre, 1552 no segundo e preto de 350 no verán.
