Representantes de 40 universidades de 15 países analizan as posibilidades laborais dos egresados na V International Administrative and Teaching Staff Training Week
As universidades europeas levan anos tratando de adaptar a preparación do seu estudantado para o mundo laboral, non só dende o punto de vista académico, senón tamén do profesional. A formación para o emprego e o emprendemento tense convertido xa nunha competencia transversal en moitas institucións que poñen a disposición do alumnado programas de mentorización, prácticas, emprendemento, incubadoras de ideas, obradoiros para preparar as entrevistas, etc.
Moitas destas experiencias serán presentadas ao longo desta semana na Universidade de Vigo ao abeiro da V International Administrative and Teaching Staff Training Week, que nesta quinta edición leva como título Employment and Entrepreneurship. Developing students’ capacities under Erasmus+. As sesións arrancaron este luns e desenvolveranse entre Vigo, Pontevedra e Tui ata mañá venres coa participación de 50 representantes de 40 universidades de 15 países europeos.
Os encargados de dar a benvida aos participantes foron Manuel Fernández Iglesias, vicerreitor de Extensión Universitaria e Relacións Internacionais e Dolores González, vicerreitora de Estudantes. Ambos destacaron a importancia de “coñecer as propostas e experiencias que se desenvolven noutros países e institucións no eido do emprego e o emprendemento, ao tempo que expomos o que facemos aquí para axudar a que os nosos estudantes atopen traballo”.
