Universitas

Primeiro simulacro de atentado da Universidade

Universitas

FACULTADES

Primeiro simulacro de atentado da Universidade

Un momento do simulacro de bomba.
photo_cameraUn momento do simulacro de bomba.

enmárcase na implantación e revisión dos plans de autoproteccióN

No marco da implantación dos plans de autoprotección cos que contan as diferentes facultades e escolas da Universidade para facer fronte a posibles emerxencias, o Servizo de Prevención de Riscos Laborais organiza simulacros que permiten poñer en práctica as medidas recollidas no documento e a formación adquirida polos equipos de emerxencia dos diferentes centros. Mais ata o de agora, ningún destes simulacros afectara conxuntamente a varias facultades e escolas, como aconteceu no campus de Pontevedra, onde unha suposta ameaza de bomba motivou a evacuación das facultades de Fisioterapia, Ciencias da Educación e do Deporte e Ciencias Sociais e da Comunicación, así como da Escola de Enxeñaría Forestal. Efectivos da Policía Nacional, Policía Local Bombeiros de Pontevedra e 061 participaron neste simulacro, no que finalmente tiveron que atender unha situación real, a dunha alumna que sufriu unha indisposición minutos antes do seu inicio.

“É a primeira vez que facemos un simulacro con varios centros á vez e a tamén a primeira vez que simulamos unha ameaza da bomba”, salienta María José Montero, técnica do Servizo de Prevención de Riscos Laborais, dunha acción que completaba a implantación dos plans de autoprotección de Ciencias da Educación e do Deporte e Fisioterapia, ao tempo que servía tamén para revisar os previamente implantados en CCSS e da Comunicación e na EE Forestal, que xa desenvolveran simulacros de seu previamente. “Saíu todo bastante ben, faltáronnos os equipos externos por mor desta emerxencia real”, engade Montero dunha iniciativa que levou ao alumnado, profesorado e persoal de administración de servizos ata o acceso á Illa das Esculturas, “punto de encontro común para todo o campus”.