Ciencias da Educación e do Deporte acolleu unha xornada sobre a preservación dos océanos.
Concienciar a aqueles e aquelas que o día de mañá se dedicarán a formar ás novas xeracións da importancia dos océanos na sustentabilidade do planeta é o propósito central das xornadas "Bo uso e mal uso do mar", que a Facultade de Ciencias da Educación e do Deporte promove xunto co Campus do Mar e o Consello da Cultura Galega.
A través de diferentes relatorios e obradoiros, esta iniciativa busca afondar na necesidade de promover unha “nova cultura do uso do mar”, como salientou na súa inauguración o coordinador da sección Ciencia, Natureza e Sociedade do Consello da Cultura Galega, Francisco Díaz-Fierros, quen defendeu a importancia dun labor educativo que permita facer que todo o coñecemento científico xerado arredor dos océanos “tamén sexa participado polo que son os protagonistas do seu uso”.
“Para Galicia o mar ten unha importancia vital”, engadiu a profesora María Álvárez Lires, coordinadora dunhas xornadas que tratan de amosar “cales son as boas e malas prácticas”, co propósito de que os profesores e profesoras do día de mañá "actúen en favor do medio ambiente”. Para iso, este seminario combinou os relatorios da catedrática da Universidade de Umeå (Suecia) Nora Rhätzell, da investigadora do Instituto Nacional de Desenvolvemento das Pescas de Cabo Verde Elisia Silva e do catedrático da Universidade de Surrey (Reino Unido) David Uzzell, coa instalación na facultade dos obradoiros do programa Mergúllate no Océano, do Campus do Mar.
