Os vigueses acadaron 207 puntos, 12 máis que os coruñeses, segundos clasificados.
Tratábase da segunda ocasión na que as instalacións deportivas do campus de Ourense acollían o Campionato Galego Universitario de Natación, unha competición na que participan equipos das tres universidades galegas e que se celebra de xeito rotatorio nos sete campus da comunidade. Parece que o espazo foi o perfecto para a Universidade de Vigo que se proclamou campiona desta competición na que participaron máis de medio cento de deportistas. Competiron en ata 24 modalidades e a Universidade de Vigo alzouse con 11 medallas de ouro, oito de prata e outras oito de bronce e proclamouse así gañadora da competición por equipos cun total de 207 puntos, con 12 de vantaxe sobre o segundo clasificado, a Universidade de A Coruña. Pola súa banda, a Universidade de Santiago quedaba terceira con 92 puntos, despois de chegar a Ourense con dez baixas importantes de última hora e un equipo moi reducido.
Os nadadores e nadadoras dos equipos A e B da Universidade de Vigo deixaron o pavillón ben alto durante a competición, acadando moi bos resultados en case todas as modalidades, aínda que a proba estrela foron os 200 m libres masculinos, na que Cristian Fernández, Ecequiel Quiroga e Iago Lorenzo fixeron pleno no podio. Unha vez máis, os nomes destacados da xornada foron o de Marc Ciurana, Laura Pimentel e Xenia Vilariño, que remataron a xornada con dúas medallas colgadas do colo, dous ouros no caso do nadador e ouro e prata e ouro e bronce no das rapazas, respectivamente.
Aínda que a Universidade de Vigo estivo presente en case todos os podios dende o inicio da competición, houbo que esperar á sétima proba para comezar a gañar ouros.
