.
O secretario xeral do PSdeG, Xosé Ramón Gómez Besteiro, asegurou que o novo tempo político do seu partido e o seu labor na oposición non será a do 'e o teu máis' e condicionou calquera acordo co PP a un 'cambio' na súa forma de facer política.
'Cando un ofrece pactos e non está disposto a corrixir esa política o que está a facer é un brinde ao sol', sinalou Besteiro nunha entrevista a RNE recollida por Europa Press. Así e fronte ás críticas dende o PP sobre a falta de pactos por parte do PSOE, advertiu de que a formación que representa 'ten vontade' para chegar a puntos de encontro sempre que sexa en beneficio dos 'intereses dos galegos'.
'E para iso hai que facer esforzos', aclarou, para argumentar que despachar 'en cinco días' o Debate do Estado da Autonomía e a presentación dos presupostos 'demostra claramente' que o PP chegou sen intención de 'cambiar en nada a súa forma de facer política'.
Baseándose nesta idea, destacou o papel do novo voceiro do Grupo Socialista, José Luís Méndez Romeu, de quen valorou a súa 'absoluta solvencia', falando dos 'problemas dos galegos' e 'para os galegos', formulando a realidade de Galicia e 'solucións' sobre desemprego e poder financeiro.
A iso contrapuxo a visión 'absolutamente irreal' que presentou o presidente da Xunta, Albergo Núñez Feijóo, que na súa opinión non foi 'capaz de asumir os grandes retos' que Galicia necesita neste momento, como é 'crecer e xerar emprego'.
'Creo que cando un fai un diagnóstico tan fóra da realidade de Galicia, calquera tipo de medida para loitar contra ese diagnóstico é negativa', sinalou. Besteiro arremeteu, así, contra medidas como os 'repagamentos' formulados polo PP, que camiña cara a 'un sistema impositivo claramente regresivo' ao apostar polos impostos indirectos, que afrontarán por igual os cidadáns con capacidade económica e aqueles que non a teñen.
PERSPECTIVA 'MOI NEGATIVA'
Así mesmo, mostrouse convencido de que os galegos 'perciben' o 'erro' de dicir que 'todo vai mellor que hai cinco anos', e que as contas para o próximo ano 'non van contribuír a facer mellor a vida' dos cidadáns. 'Esa é a crua realidade'.
Besteiro criticou que as contas para 2014 están 'mil millóns' por debaixo da débeda e que o Goberno está a pasar 'de ser xestor da austeridade' a 'xestor da precariedade', dado que a necesidade de aumentar as partidas para as Risga demostra que 'a xestión non está a ser boa'.
'Esa lectura optimista ten moi pouco de realista', insistiu. Así, explicou que 'cada vez teñen un peso menor' as potencialidades para avanzar na recuperación e que as contas deixan a Galicia sen capacidade de inversión, mentres as empresas seguen sin 'ter capacidade de crédito' e a cifra de parados segue sendo alta. 'O prognóstico é moi, moi pero que moi negativo', lamentou.
Sobre todo, criticou que son os cidadáns os que 'día a día' ten que facer fronte' á débeda pública, mentres cada vez se fai máis necesario destinar partidas para 'paliar os efectos da precariedade' a causa da 'mala xestión' de Feijóo. Por iso, rexeitou o 'discurso triunfalista' do presidente galego mentres 'cada día' Galicia soporta 'un peso insufrible para facer fronte á débeda pública'.
Por todo iso, o novo líder dos socialistas galegos recordou que o PSdeG afronta dende 'hai un mes un paso cara a adiante cara ás súas bases' co fin de 'recuperar a credibilidade' e tamén 'a confianza na política', nun momento no que 'moita xente o está a pasar mal'. 'Temos que dar exemplo de máis implicación e transparencia'.
