O alcalde popular de Larouco, Joaquín Prieto Rodríguez, accedeu á Alcaldía a finais da década 1990-2000.
O alcalde popular de Larouco, Joaquín Prieto Rodríguez, accedeu á Alcaldía a finais da década 1990-2000. Foi no ano 1997, despois de catro anos como concelleiro. Dende entón repetiu maiorías absolutas nun concello dos de menor número de habitantes de Galicia: 544, segundo o padrón municipal de 2014.
Que cambios houbo no Concello dende aqueles anos?
O Concello cambiou bastante. A situación mudou e penso que a mellor. Mais os pobos pequenos van a menos. Xa se sabe o que pasa no rural: non nacen nenos. Cada vez hai máis xente maior. A xente nova escapa dos pobos ao non ter alternativas e traballo, e vaise ás grandes vilas.
Manteñen as axudas á natalidade?
As seguimos mantendo, por unha cantidade que varía de 600 a 1.000 euros por nacemento. É unha axuda pero non é incentivar os nacementos.
En Larouco carecen de oficina bancaria. A de Abanca, cuia defensa mobilizou á poboación, abrirá outra vez?
Andamos negociando cos directivos. O baixo que ocupa é da súa propiedade e púxenme en contacto co seu xefe, Escotet. Envioume un representante de Abanca e andamos mirando. O banco ten a oficina totalmente montada, so precisaría coller unha persoa e poñela aí un ou dous días por semana. Tampouco é pedir moito. Se dixeras, teñen que alugar o baixo ..., pero non se necesita tanto, é propiedade de Abanca e está totalmente equipado e montado. De feito, un ano antes de pechalo, reformárase totalmente.
O colexio tamén pechou. Hai algunha posibilidade de que abra novamente?
O colexio tamén nolo quitaron. Daquela, mantiven unha reunión co conselleiro, mais dixo que non é rendible ter un colexio para tres nenos e que, no caso de que nun futuro houbese máis, volveríase a abrir. Tal e como está a situación das familias hoxe, véxoo difícil.
Como ve o futuro do rural?
Véxoo negro como non tome parte a Administración. Está todo a monte e iso que se está empezando a traballar outra vez o campo. Hai novas plantacións. Temos o proxecto dos castiñeiros; plantáronse 15 hectáreas e agora queren plantar outras 30. Tamén queren iniciar algo con ovellas neses castaños. Hai xente nova que se animou a plantar viñedos, temos a adega Viña Costeira, que se animou a vir a Larouco, mercou Don Mario e estase implantando con forza. Son iniciativas agrícolas, mais deben ter o apoio da Administración.
A Administración non apoia entón ao rural?
Penso que apoia máis ás grandes cidades que ao rural. Dende o meu punto de vista. Precísanse subvencións, incentivar a actividade agrícola e á xente nova.
Larouco non podería servir como residencia de traballadores que teñen o seu empleo en vilas como O Barco ou A Rúa?
É unha demanda que fixen á Xunta hai moitísimos anos. Cando mantiven a entrevista polas primeiras vivendas de protección oficial, pedín que se convocase o concurso a nivel comarcal e non só para Larouco. Dixéronme que para ter dereito a unha vivenda de protección oficial, o solicitante debía levar tres ou catro anos censado no Concello. Pero a xente que vive aquí xa ten casa, non o necesita. O asunto era abrir o concurso e que viñesen de A Rúa, O Barco ou Vilamartín. Nunca o aprobaron. Levo solicitado vivendas de protección oficial estes anos, mais, tal e como están os tempos, din que non se fan. Tanto na primeira como na segunda fase de chalés adosados de Larouco, o Concello pedía un concurso a nivel comarcal e non local.
Que saída ve para concellos como Larouco?
Dotar aos concellos do rural con infraestructuras e, neste caso, con vivendas. Dar facilidades á xente nova para adicarse a agricultura e, se traballa nas canteiras, casas para que poida vivir en Larouco. Nós temos dous locais que imos habilitar entre este ano e principios do que ven. Eran as antigas escolas, que imos preparar para alugar á xente que vive fóra e queira vivir en Larouco, mais cun arrendamento simbólico. Non desorbitado. Agora non se destinan a ningún uso e xa están dotados cos servizos de auga e electricidade.
A Corporación a forman catro concelleiros do PP e tres do PSdeG-PSOE. Como é a relación coa oposición?
Boa. Temos unha oposición totalmente colaboradora, non hai ningún tipo de problemas. Nunca os houbo. Sempre se levaron os temas a pleno e se discutiron. É unha oposición constructiva.
Que proxectos manexa o equipo de goberno na actualidade?
Un dos proxectos é o da granxa escola. A memoria está feita. Estou pendente da entrevista coa conselleira do Medio Rural. Era un compromiso da anterior, Rosa Quintana. Agora ao cambiar a Consellería volvín pedir a entrevista para presentar o proxecto. Sería a construcción da granxa escola cun albergue e, posiblemente, darlla a unha empresa para que a xestione. Habería que mirar a fórmula. O Concello ten unha parcela de cáseque cinco hectáreas e habería que elexir o sitio do albergue e as aulas.
Que ofrece Larouco aos posibles novos veciños?
É un concello con residencia da terceira idade, con 84 prazas conveniadas. Estamos pendentes de habilitar un centro de día a nivel comarcal e tamén de usar as instalacións de fisioterapia para os veciños. Temos piscina, ximnasio municipal, pero para que veña xente hai que ter infraestructuras. Vivendas en aluguer hai moi poucas.