En todas as épocas houbo diferenzas entre xeracións e desconfianzas mutuas. Xa saben do filósofo grego que se queixaba, hai moitos séculos, da vida ousada e desordenada dos mozos do seu tempo. É normal que mozos e adultos e vellos lean libros distintos, escoiten música moi diversa ou sigan programas de televisión e películas moi dispares entre si. Sempre foi así. O que quizais non pasou nunca é que se chegase a formas de comunicación tan arredadas como incomprensibles entre si. Onte, na televisión, interpelaban a persoas da rúa para que descifrasen este enigma: ktaptccr oi. De 30 anos para enriba ninguén era capaz de ler aí nada. Por baixo desa idade, en cambio, a comprensión era doada: a mensaxe preguntaba ¿Que te apetece hacer hoy? Mozos e adultos están incomunicados en moitos aspectos: quizais a linguaxe do móbil non fai máis que referendar, con contundencia, esta realidade.
