Ao longo de toda a semana pasarán polo salón de actos do CEIP Xoaquín Lourenzo de Bande 14 grupos escolares e amateur de teatro
Cativos de Chantada (Lugo) e ourensáns de Ramirás, Os Blancos e Bande protagonizaron onte a xornada inaugural dos “XXVIII Encontros de Teatro escolar e amateur de Bande”. A alcaldesa de Bande, Sandra Quintas, foi a encargada de dar a benvida aos participantes e ao público congregado no salón de actos do colexio de Educación Infantil e Primaria Xoaquín Lourenzo da localidade.
Ao longo da semana pasarán polo escenario escolar unha ducia de grupos de ensinanza e amateurs das provincias de Ourense e de Lugo, nunha actividade para todos os públicos aberta á veciñanza. As representacións arrancarán as dez da mañá e sucederanse ata as 13,00 horas en función do número de obras e a duración.
Os Encontros de Teatro escolar e amateur de Bande volven ao calendario festivo de Bande despois de tres anos de parón pola pandemia. A actividade, que conmemora a festividade das Letras Galegas, xurdiu fai tres anos dende o Centro de Recursos de Bande do CEIP e actualmente conta coa colaboración do Concello e da Xunta de Galicia, ademáis do IES AQuis Querquennis.
