O presidente da Xunta de Galicia, Alberto Núñez Feijóo, afirmou esta mañá en Vigo que tras as cifras acadadas polo sector pesqueiro nesta cidade o porto converteuse como 'panca' para 'o inicio da senda' da recuperación económica en Galicia.
Durante a presentación dun estudo socioeconómico realizado pola Autoridade Portuaria viguesa en colaboración coa Cooperativa de Armadores (ARVI), o presidente do Executivo galego destacou a 'relevancia' do sector pesqueiro vigués vinculado á 'dinamización económica' da Comunidade autónoma.
As cifras presentadas no estudo 'O sector pesqueiro de Vigo: avaliación do seu impacto socioeconómico', revelan a existencia de 8.957 empregos xerados directamente pola frota pesqueira viguesa aos que se suman os 4.273 indirectos na cidade e na súa área, sen ter en conta as actividades de comercialización, transformación e distribución.
Estas actividades teñen a súa estimación, no ámbito estatal, en 15.317 empregos que, sumados aos directos e indirectos xerados, xerarían unha cifra de 28.547 postos de traballo en total.
O liderado da dársena relativa á descarga de pesca para consumo humano, as infraestruturas das que dispón, a súa situación xeográfica, e a industria frigorífica e conserveira adxacente, son para o presidente 'complementos fundamentais' para manter a Vigo como porto de referencia internacional.
Segundo os datos facilitados polo presidente do Executivo, 44.000 cidadáns galegos traballan para o sector, contando a Comunidade con 123 portos de interese autonómico e 5 de interese xeral.
Para a consecución destas cifras, Feijóo estimou 'fundamental' a conxunción de intereses entre o sector e as administracións públicas, cuxas negociacións levaron a conseguir 'acordos satisfactorios', como a suspensión da prohibición de pesca de arrastre en augas profundas ou o aumento dun 7% na capacidade extractiva da frota tras a modificación das cotas europeas.
O presidente das Cooperativas de Armadores (ARVI), Francisco Javier Touza, reflexionou sobre as boas noticias recibidas durante o 2013 en relación co sector pesqueiro.
Así, vaticinou un aumento de entre o 15 e o 20 por cento nas cifras de emprego e negocio da frota presente no caladoiro Gran Sol tras a reforma da Política Pesqueira Común da Unión Europea e o conseguinte aumento das cotas de pesca establecidas.
O volume de negocio total da frota pesqueira pertencente ao sector extractivo en Vigo sitúase en cifras próximas aos 1.000 millóns de euros anuais, polo que Touza afirmou que en caso de cesar a actividade pesqueira '32.000 vigueses quedarían sen emprego' se se ten en conta a poboación dependente do sector.
