Rosalía de Castro estreou este ano novo “día”, tralo recente achado da súa data de nacemento verdadeira. A poeta galega protagonizou actividades en colexios, facultades e colectivos culturais que, un ano máis, reivindican a “semente” que deixou a escritora. De feito, o Campus conmemorou o Día de Rosalía baixo o lema “Sementes para o futuro”.
O alumnado da Facultade de Educación soterrou unha cápsula do tempo con pensamentos e reflexións en torno a Rosalía. Xosé Manuel Cid, decano do centro, subliñou que “Rosalía deulle a volta a este país e un xiro coperniquiano á lingua”. Na cápsula do tempo gardaron unha antoloxía poética de Rosalía, un xornal do día, un euro, unha máscara e sementes de plantas de horta e de árbores froiteiras. A idea é abrir a cápsula no 2063, cando se cumpran 200 anos da obra “Cantares Gallegos” de Rosalía.
Os máis cativos tamén realizaron actos nos centros educativos. Unha das actividades fíxose en Salesianos, onde as rapazas da escola de fútbol Rosalía recibiron un exemplar do libro “Formigas 4. Misión Rosalía”, de Pere Tobaruela.
O BNG de Ourense tamén quixo honrar a figura da escritora, cun acto no Xardín do Posío.
Hoxe continúan os actos na biblioteca do Campus e na Nós. Este espazo acollerá unha actividade infantil de Sarabela Teatro.
A Mesa pola Normalización Lingüística amosou a súa “máis enérxica protesta” contra o Concello de Ourense posto que onte “non programou ningún tipo de actividade cultural, artística ou lúdica para conmemorar esta data que nos lembra á galega máis grande e universal”. A Mesa acusa ao alcalde, Gonzalo Pérez Jácome, de “aniquilar a vida cultural da cidade”.
