No que ten que ver coas construccións xa rematadas farase unha "adaptación progresiva".
Membros da asociación Algaria de persoas con mobilidade reducida da comarca da Limia, entre os que se atopaba a presidenta da entidade, Mercedes Fernández, mantiveron unha xuntanza co tenente de alcalde de Xinzo, Manuel Casas, o responsable de Medio Ambiente, Manuel Cabas, o edil de Cultura e Deportes, Luis Miguel Gil e técnicos do Concello, co obxectivo de abordar melloras no que atinxe ás infraestructuras municipais para facelas máis accesibles.
Os representantes de Algaria, que valoraron a reunión como "positiva", solicitaron aos responsables municipais que "as obras novas que se están facendo, como é o caso das beirarrúas da avenida de Ourense, queden xa adaptadas do mellor xeito posible para as persoas de mobilidade reducida", tal e como sinalou Óscar Pena, de Algaria. No que ten que ver coas construccións xa rematadas farase unha "adaptación progresiva".
O Concello tamén mellorará a sinalización dos edificios públicos de Xinzo, como é o caso do acceso ao Museo Galego do Entroido ou ao pavillón deportivo.
