Xornal Escolar
Aprendendo no río Miño durante as vacacións
Aínda que durante a época do Nadal os colexios pechan as súas portas durante uns días, nada impide seguir aprendendo, neste caso coa natureza como libro e a conciencia medioambiental como programa didáctico. Son as dúas premisas que segue a Aula da Natureza do Río Miño no seu programa de conciliación durante as vacacións.
Co obxectivo firme de inculcar nos máis novos a importancia de coidar o entorno, durante dez xornadas, o espazo situado no entorno de Oira desenvolveu numerosas actividades nas que non faltou a didáctica pero tampouco a diversión.
Da man de expertos en diferentes eidos coordinados por Luis Herminio Amigo e Ignacio Alfredo Nanín, unha ducia de cativos participaron na edición de Nadal. Alí, participaron en obradoiros de manualidades, sesións de xogos populares, observación e aprendizaxe sobre aves, recollida de residuos, graffitis para concienciar… Cada unha das dez xornadas estivo centrada nun aspecto diferente sobre a natureza, pero todos tiveron a conciencia como nexo.
Segundo indican dende a organización, as novas xeracións están moi comprometidas co coidado medioambiental e prestan moita atención a todas as explicacións que os monitores foron ofrecendo en cada unha das sesións. Unha forma perfecta de pasar as vacacións sen perder de vista a aprendizaxe.