Xornal Escolar
Os contos do avó e o neto no Filomena Dato de Barbadás
Izan e o seu avó, Justo Calviño, pasaron xuntos o verán. Nese tempo, compartiron moitas historias e contos que espertaron o interese do cativo e déronlle unha idea ó seu avó. Se ó seu neno lle interesaban as súas historias, por que non a outros? Así naceu “Os contos do avó”, un libro que verá a luz a finais de ano pero do que os alumnos do colexio Filomena Dato de Barbadás xa puideron escoitar algúns capítulos.
Celebraban así o Día das Bibliotecas Escolares, no que gozaron ó máximo da tradición oral e mesmo se animaron a aportar o seu gran de area imaxinativo e completar os contos de Justo Calviño. Entre o público observaba Izan, moi orgulloso do seu avó e artífice deste libro que agora se prepara.
Tódolos participantes, tanto os alumnos coma os profesores, e mesmo os familiares de Izan que estaban presentes, estiveron moi implicados nas historias de Justo Calviño, veciño de Barbadás e moi nervoso pola reacción dun público tan esixente como adoita ser o infantil. Pero foi un público tamén agradecido.
O escritor centrou a súa sesión na historia de Barbadás, comezando pola Prehistoria e levando ós seus novos oíntes de forma imaxinaria ata a época dos dinosaurios. A partir de aí, foron percorrendo os contos da súa terra ata chegar ó día de hoxe, percorrendo moitos lugares sen saír do colexio.