No CEIP Baños de Molgas veñen de poñer en marcha un ambicioso plan de mobilidade activa durante os períodos de recreo do alumnado, ao tempo que contribúen a ter uns patios máis inclusivos. Desta volta, a iniciativa consiste en dotar a cada un dos escolares dun patinete e un casco protector.
“Viñamos observando con preocupación nos últimos anos como estes intres de lecer eran cada vez máis sedentarios por parte dos nosos rapaces e rapazas, ao ir diminuíndo o número de alumnado de cada grupo, cada vez as actividades que levan a cabo nos recreos esixían menos movemento, estando moitas veces sentados en grupo falando ou simplemente paseando polo patio”, explican dende o centro.
Despois dalgún tempo buscando alternativas, decidiron poñer en marcha esta iniciativa. Despois de xa algúns días nos que os cativos teñen á súa disposición todo o material, “sentímonos gratamente recompensados” pola ilusión do alumnado de participar na proposta.
Deste xeito, dende o colexio de Baños de Molgas continuan a dar pequenos pasos para seguir contribuindo ao desenvolvemento integral dos escolares, tentando dotar ao alumnado das “mellores ferramentas para seren capaces, o día de mañá, de enfrontarse ás múltiples situacións que lle vai demandando o seu futuro, con seguridade e confianza ao mesmo tempo que tentamos afianzar o convencevento e o desexo de que todos acaben sendo persoas de ben”, explican dende a directiva do centro educativo.
