O Antela FC e a Asociación Limisi uniron forzas para sacar adiante o Calendario Solidario 2024. Xogadores de diferentes equipos do Antela FC figuran nas fotografías do Calendario Solidario 2024 xunto con usuarios do Centro Ocupacional Limisi.
A Asociación Limisi creouse para a promoción de persoas con diversidade funcional, é unha asociación de pais, nais, familiares, amigos e persoas con discapacidade intelectual que comeza a súa andaina en novembro do 2002.
Todo o recadado coas ventas do calendario será integramente destinado a sufragar gastos de mantemento de servizos e actividades de Limisi. Neste proxecto conxunto entre o Antela e Limisi queren por en valor o traballo en equipo e cooperativo. O calendario abre co lema “Este partido xogámolo en Equipo”. Non hai mellor forma de loitar contra as desigualdades e a marxinación que en equipo. Xuntas, todas as persoas dunha comunidade cun obxectivo común, sinalan os promotores da iniciativa.
Este calendario con fotografía de Pablo Araujo, deseño de Planb Estudio e impresos en Imprenta Blanca representa situacións cotiás nos partidos de fútbol, e, xunto con frases motivadoras e unha estética coidada, pretende sensibilizar sobre a diversidade funcional.
Hai dous modelos de calendario, un pequeno de mesa a 3 euros e un grande de colgar en parede que custa 6 euros a unidade e 10 euros o par.
