En que consistiu este programa?
No Viso traballamos dende o rural e para o rural. Démonos conta da problemática existente en torno á fenda dixital. Danos un pouco de medo que o avance dixital sexa tan rápido para un contexto que non ten esa inmediatez. Esto sempre o traballamos, pero nos últimos meses o fixemos máis. Participaron medio cento de persoas repartidas en cinco grupos en Xinzo, Sandiás, Vilar de Barrio e Sarreaus. Combinamos o uso do teléfono coa formación en cultura dixital.
Os maiores non sacan partido aos seus teléfonos?
O móbil para estas persoas é unha ferramenta externa. Todos os días hai que vencer unha pequena vergoña á hora de empregar o teléfono. O móbil para os maiores segue sendo un teléfono, non un dispositivo intelixente.
Como o consegue?
Eu estoume ruralizando. Vivín 18 anos na cidade e acabo de volver. Aproveitaba para compartir as miñas experiencias con eles, por exemplo, á hora de pedir permisos por Interner para facer unha poda. Así acadábamos unha maior conexión entre uns e outros.
Esta fenda dixital é máis grave no rural?
O móbil é unha parte, pero a cultura dixital é moito máis. Está no día a día e moito máis no urbano. Por exemplo, que haxa unha pantalla que indique o tempo que tarda en chegar un autobús é un paso previo á hora de facerse cunha aplicación que permita comprobar isto. Se no rural, apenas temos transporte, ¿que aplicación imos a ter?
Ademais de loitar contra o illamento, ¿que beneficios ten para os maiores aprender a usar o teléfono como dispositivo intelixente?
Que un avó saiba o que é o Tik Tok vai a permitirlle estar máis preto dos seus netos. Tamén que saiba empregar un filtro ou facer un ‘selfie’”. Sobre todo esto último permitiralle ter risas en común co seu neto, e iso é xenial. Se os maiores non teñen cultura dixital iremos afastándonos deles.
Que apreciou vostede que era o que máis lle gustaba aos maiores de Internet e do móbil?
Recuperar a súa memoria histórica. Ver fotos e vídeos antigos, por exemplo, do ciclo do pan.
Entre os alumnos, ¿cales eran as maiores inquedanzas no uso do móbil?
A seguridade. Preocupáballes o feito de poder empregar as aplicacións sen medo a un roubo. Moitos dicían iso de “Ai! eu non entro en nada, so o Whatsapp non vaia ser!”.
Que é o que lle proporcionou a vostede este curso?
Tirar pola miña xente. Sentín moita conexión. É que iso non é traballo.
