Malia que a tempada por excelencia de eventos, a estival, xa quedou atrás; en Sandiás veñen de inaugurar outra, a de outono e inverno, con máis dunha vintena de iniciativas culturais e lúdicas pensadas, especialmente, para os veciños. Tamén haberá espazo para a concienciación medioambiental xa que, como outros anos, reeditaranse as actividades con Amigas das Cegoñas e Ecoloxistas en acción Ourense.
En Sandiás terán lugar iniciativas culturais e educativas como obradoiros, xornadas micolóxicas ou espectáculos de maxia.
De cara ao Nadal, levarase a cabo unha campaña de recollida de alimentos e a primeira edición do Concerto de Nadal na Igrexa de Santo Estevo.
A programación ao completo foi presentada polo alcalde, Felipe Traveso, e dous concelleiros do seu equipo: Pilar Cabrera e Pepe Gándara. Dende o grupo de goberno desexan que sexa “do interese dos veciños e veciñas”.
Para información e inscricións, difundiranse carteles coas actividades de xeito específico.