Baixo o lema “Eu merco en Allariz, eu merco en galego”, o Concello alaricano -a través das concellerías de Promoción Económica e Normalización Lingüística- promoverá entre os vindeiros días 14 e 18 de maio unha campaña de apoio ao tecido comercial, ao tempo que promociona o uso do galego nas transaccións económicas da vila.
Segundo explicaron dende estas áreas, procurarase que se atenda á clientela e aos provedores preferentemente en galego e que todos os rótulos, carteis e publicidade, xunto con elementos exteriores, estean tamén nesta lingua. Tamén se busca estimular á clientela galegofalante a que manteña a súa lingua habitual nas relacións comerciais e animar a que fale na lingua propia aquel que non o fai habitualmente.
Preténdense, en definitiva, reforzar “os valores positivos” que pode engadir o galego na comunicación comercial e, por este motivo, todas as persoas que realicen compras entre os próximos 14 e 18 de maio nos establecementos de Allariz que se acollan á campaña recibirán un adhesivo e poderán optar a dous premios de 100 euros para mercar no comercio local, así como dous lotes de libros de Xela Arias, autora homenaxeada este ano no Día das Letras Galegas.
Por último, o Concello pon a disposición do sector comercial o enderezo electrónico [email protected] para dúbidas sobre o uso do galego.