A antesala dos Mestre Mateo premia o filme "O home e o can"

A vila alaricana acolleu onte a xuntanza de finalistas dos XXI Mestre Mateo, a antesala da gala de entrega de premios que se celebrará en Ourense o 11 de marzo. Na cita foron premiadas as longametraxes “O corpo aberto”, “Velntina” e “O home e o can”, a serie “Rapa” e a curtametraxe “La entrega”.

A xunta directiva da Academia Galega do Audiovisual estivo representada por Álvaro Pérez, o seu presidente; Carmen Méndez, tesoureira, e Saamira Ganay, a secretaria. Eles foron os encargados de dar a benvida aos finalistas no hotel Oca Vila de Allariz, para despois acompañalos nunha visita guiada polos lugares más emblemáticos da localidade. Na cita tamén estiveron presentes a súa alcaldesa Cristina Cid, María López, concelleira de Promoción Económica; Jacobo Sutil, director da Axencia Galega das Industrias Culturais; Patricia Torres, deputada de Cultura en Ourense, e outras autoridades galegas.

Previo a entrega de premios, os asistentes desfrutaron dun menú degustación a cargo de Cociña Ourense e brindaron con viño da DO Ribeiro. O primeiro premio que se entregou foi o Premio Abanca ao impulso da sostibilidade para “O corpo aberto” por “ter presente durante as etapas de desenvolvemento e produción o impacto ambiental desde os diversos procesos que rodearon ao filme”, explicou Sergio Martínez, xerente de marketing de Abanca na entrega do galardón.

Marcial Gende anunciou o Premio Deleite á promoción da lingua para o filme “Valentina” por apostar “pola versión orixinal en galego nunha ilusionante historia dirixida a público infantil”. O debut na dirección da produtora Chelo Loureiro recibiu en 2022 o premio Goya da Academia de las Artes y las Ciencias Cinematográficas.

O Premio Galicia Calidade á promoción exterior recaeu en“Rapa”. Ana Méndez, xerente de Galicia Calidade, definiu a serie como “unha produción que revelou a milleiros de espectadores as espectaculares paisaxes das Rías Altas, ao tempo que resultou premiada, recoñecida pola crítica e adorada polo público”. A produción de Portocabo parte con 19 finalistas nesta edición dos Mestre Mateo.

Marta Díaz, responsable de marketing de Cafés Candelas, anunciou o Premio Cafés Candelas á produción máis inspiradora para “La entrega”, que “pon o foco na urxencia de loitar contra o illamento e a incomunicación revelando a importancia e o poder transformador dos pequenos xestos cotiás”. Este filme de Pedro Díaz foi finalista na categoría de Mellor curtametraxe nos Premios Goya.

A entrega dos premios especiais finalizou co Premio Ouresne Film Commission entregado por Patricia Torres a “O home e o can” por filmar “a diversa riqueza da paisaxe ourensá como marco para a súa trama na que fai unha chamada sobre o baleirado humano do territorio e a soidade dos nosos maiores".