Paderne contará cun novo centro de transformación

A Deputación de Ourense, a través do Inorde, converterá a antiga estación de tren de Cantoña, en Paderne de Allariz, nun centro de transformación de produtos do sector primario. Máis concretamente, os pequenos produtores e emprendedores do rural, cunha formación específica, poderán desenvolver a súa actividade transformadora en produtos de horta, froitas, verduras, cereais ou mel para comercializar, distribuír e promocionar o produto final no circuíto corto de comercialización.

Para avanzar nesta idea, o presidente da administración provincial, Manuel Baltar, mantivo un encontro coa xerente do Inorde, Emma González, onde acordaron o primeiro investimento: 250.000 euros para a fase inicial.

A iniciativa aspira a ser “unha ferramenta de innovación” para os pequenos produtores e emprendedores do rural ourensán, mediante a que se quere fomentar o desenvolvemento socioeconómico da provincia en base á produción de elevado valor engadido para circuítos comerciais de proximidade, permitindo identificar “novas actividades económicas” e “potenciar novos cultivos”.

Manuel Baltar matizou que “este proxecto aspira a converter a estación de tren -mantida polo Inorde dentro do convenio con ADIF- nunha planta de procesado dos nosos produtos, dentro dunha acción transformadora da economía produtiva da provincia”. A xerente do Inorde, Emma González, destacou o potencial transformador deste proxecto dentro do sector primario, unha liña de traballo clave contra a despoboación: “Este proxecto é unha actuación transformadora que pode contribuír á reagrarización e á posta en valor dos nosos produtos locais”.

Por medio da achega inicial rehabilitarase a vella estación de tren e recuperaranse terras para o cultivo que o goberno provincial ten na Finca de Antela, en Sandiás, na que se desenvolverá no futuro un programa de apoio a emprendedores, optando por cultivos que dinamicen a biodiversidade da terra. O equipamento da infraestrutura quedará para próximas etapas.