Roberto Freire é o presidente da Asociación de Comerciantes e Empresarios de Maceda dende hai dous anos. Logo dun periodo complicado marcado pola pandemia, Freire márcase como obxectivo recuperar os encontros entre os asociados -actualmente hai 62- e cos políticos locais para perfilar ideas e iniciativas que contribúan a reactivar a economía local. Por enriba da mesa está a posibilidade de instaurar un bono-tarxeta que premie a fidelidade ou a recuperación de campañas propias de diferentes épocas do ano.
Fixeron unha campaña para atraer socios recentemente, deu resultado?
Si, hai novos socios. Houbo un periodo hai tempo no que a asociación non tiña tanta actividade e algúns déronse de baixa. Actualmente non pasamos cuotas debido á situación que atravesamos, pero próximamente imos a ter unha reunión e a recuperar a actividade. O técnico de emprego do Concello apoianos moito. É certo que agora estamos un pouco á expectativa á hora de facer algún evento polo risco que poida haber por mor do covid.
Ademais da posibilidade de activar un bono - tarxeta, sobre que outras liñas queren volver ao traballo?
Queremos pautar as datas sinaladas e concentrar aí as iniciativas e eventos. Precisamos tamén apoio institucional e penso que sería interesante retomar as mesas redondas co alcalde e co resto dos partidos políticos que levamos a cabo anteriormente. Aí xurdiron moitas ideas. Para Semana Santa, verán e datas sinaladas agardamos reactivar as campañas. Este ano, por cuestión de tempo, non participamos na de Nadal.
Como está o sector comercio en Maceda logo da pandemia?
Hai unha situación crónica, herdada e cunha tendencia clara. Non podemos negalo. Hai un despoboamento no rural que nos afecta. A pandemia agravou isto e agora temos incertidume. Si hai pequenas iniciativas e Internet é un campo a explorar para o pequeno comercio.
Que grao de exploración hai neste senso en Maceda?
Penso que pouco, pero e que é Internet non é doado. Compites con moita xente. Hai que recordar que a posventa é o prato forte noso. Se un cliente ten un problema, o arranxas no momento ou senón ao día seguinte. É un plus que un gran superficie comercial moitas veces non che da.
Cal é o potencial do comercio de Maceda?
A cercanía é moi importante no comercio. O contacto humaniza e fainos mellores persoas. Aquí temos todos os servizos e estamos ubicados a 20 minutos de Ourense. Aínda que o comercio en Maceda foi a menos continuamos tendo de todo: restaurantes, cafeterías, pequeno comercio, abríronse novas tendas de roupa…
Os alcaldes de Maceda, Vilar de Barrio e Baños de Molgas abogan por recuperar as sinerxias entre os tres concellos, sería interesante facelo a nivel comercio?
Penso que é capital. Os pobos cada vez teñen menos xente e loitamos contra un xigante. A globalización está aí e é coma un rodillo que pasa. A única maneira de sobrevivir é xuntarse en núcleos máis grandes. Eu xa lancei esta idea na asociación de xuntarnos con outros comercios doutros municipios. Hai que xuntarse a nivel supramunicipal para facer campañas e promocións.