Allariz

Xovenes de cinco países europeos debatirán en Paciños sobre medio rural


Allariz

ALLARIZ

Xovenes de cinco países europeos debatirán en Paciños sobre medio rural


Os participantes proceden de España, Grecia, Rumanía, Croacia e Portugal

A Fundación Ramón González Ferreiro organiza do 18 ao 25 de abril o intercambio internacional “Modern shepherds" (pastores modernos), un encontro localizado na Reserva da Biosfera Área de Allariz que reunirá a un total de 43 persoas de cinco países europeos (España, Portugal Grecia, Rumanía e Croacia) no marco do programa "Erasmus+" da Comisión Europea.

Durante oito días, mozos con idades comprendidas entre os 18 e os 30 anos participarán un intercambio de ideas, culturas, experiencias e valores baixo una metodoloxía de educación non formal. "É unha fermosa experiencia nun entorno natural e rural, rodeados de xente de diferentes nacionalidades onde compartir e aportar o mellor de cada un", subliñan dende a fundación alaricana, que recoñecen que eses días o idioma oficial de Paciños será o inglés.

Mediante presentacións, obradoiros e visitas a diferentes espazos e iniciativas empresariais, como a Granxa-Queixería ou Centro de Educación Ambiental do Rexo e a cervecería artesanal de A Dama Alaricana, os mozos aprenderán e coñecerán diferentes proxectos e programas que lles permitan crecer e poder desenvolver a súa propia iniciativa no seu pais de orixe.

As instalacións de Paciños estanse a converter no epicentro cultural e formativo do municipio coa celebración de cursos e obradoiros formativos (inglés, alemán, poda) e mesmo de ocio (titieres, conta contos,...). Nesta innovadora acción a Fundación Ramón González Ferreiro colabora coa Asociación Cultural Sende, situada na Baixa Limia, dentro da estratexia "De Educación e Formación 2020 do Parlamento Europeo".

Para participar na iniciativa, aínda quedan prazas libres, polo que os responsables animan aos mozos ourensanos a poñerse en contacto coa fundación e anotarse no encontro antes do vindeiro luns día 23 de marzo, para o cal deberán presentar os seus datos e unha carta motivacional que exprese as razóns para participar no intercambio.

Más en Allariz
Comentarios