O Comité pola Memoria Histórica do Val do Limia organizará, o vindeiro domingo día 28 de agosto en Ferreiros de Entrimo, unha nova homenaxe ás vítimas do fascismo na comarca da Baixa Limia. Os exteriores da capela de Sobreira acollerán, a partir das seis da tarde, o acto de lembranza das 14 vítimas do fascismo verificadas neste concello da “raia”.
No marco da programación está prevista a participación de grupos de música tradicional e tamén de recitais de poesía, antes da intervención do voceiro do colectivo Carlos Morais, paso previo a inauguración solemne do monolito obra do mestre canteiro Diego Currás “O Rixón”.
