A Porta do Parque de Entrimo acollerá este sábado, día 9 de decembro, un Mercado de Nadal, unha excelente oportunidade para adquirir os agasallos destas datas para familia e amigos. Artesanía, cosmética, gastronomía e actividades infantís encherán de vida o número 12 do edificio da estrada de Queguas, nunha xornada especial que arrancará ás 11,00 horas e se desenvolverá ata as 20,00 horas.
O mel será a protagonista especial desta edición, contando con postos de venda de mel e produtos de cosmética, un obradoiro de velas de Nadal con cera de abella impartido por Lourdes Rodríguez Domínguez ás 11,30 horas, e sendas charlas para adultos sobre “Mitos e verdades sobre o mel” a cargo de Anna Fort López (ás 17,00 horas) e, para os nenos, “Coñecendo as abellas” da man de José Manuel González Paz as seis da tarde. Para os máis cativos tamén haberá pintacaras (tres euros) e, de 12,00 a 18,00 horas, haberá a oportunidade de facer un paseo en poni (cinco euros).
Gastronomía
Ao longo de todo o día haberá comida e bebida para os asistentes, desde pinchos de panceta e chourizos, queixos variados e empanadas, incluída a de forquellas típica da zona, ata chocolate quente con bica. Ademáis, ás sete da tarde está anunciado un sorteo presencial de lote de produtos.
